Posted: 03/08/2013 08:33 PM IST

వేసవి ప్రారంభమవుతూనే మన్యంలోకి వ్యాధులను తీసుకొచ్చింది. మలేరియాకన్నా ముందు డయారియాను వెంటబెట్టుకు వచ్చింది. వారం రోజులుగా మన్యంలో చాపకింద నీరులా ఈ మహమ్మారి వ్యాపిస్తోంది. నాలుగు మండలాల్లో సుమారు పది గ్రామాల్లో ప్రజలను వణికిస్తోంది. ఈ వ్యాధి విరుచుకు పడడంతో మండలంలో మారుమూల ప్రాంతమైన అల్లంపుట్టు విలవిలలాడుతోంది. బుధవారం ఒక్కరోజే ముగ్గురు గిరిజనులు వాంతులు, విరేచనాలతో బాధపడుతూ చనిపోవడంతో గ్రామమంతటా విషాదం అలుముకుంది. గ్రామస్తులు తాగుతున్న కలుషిత జలమే కాలకూట విషమై కాటేసింది. పంట పొలాల మధ్యననున్న ఊట వద్ద సేకరించిన కలుషిత జలాల కారణంగా ముగ్గురి ప్రాణాలు గాలిలో కలిసిపోయాయి.

అన్నెంపున్నెం ఎరుగని ఏడేళ్ల చిన్నారి విజయశాంతితోపాటు కొర్రా చిన్నమ్మ(45) అనే మహిళ, బడ్నాయిని బుచ్చన్న(40)లను డయేరియా కబళించింది. 130 మంది ఉన్న ఈ కుగ్రామంలో ఇప్పుడు అనారోగ్యం స్వైర విహారం చేస్తోంది. సకాలంలో వైద్య సాయం అందక ముగ్గురిని కబళించడంతోపాటు మరెందరినో పట్టి పీడిస్తోంది.