Posted: 02/22/2013 07:25 PM IST

ఉత్తరాంధ్ర ఉపాధ్యాయ ఎమ్మెల్సీ స్థానానికి గురువారం పోలింగ్ ప్రశాంతంగా జరిగింది. ఉదయం ఎనిమిది గంటలకు ప్రారంభమైన పోలింగ్ సాయంత్రం సాయంత్రం నాలుగు గంటలకు ముగిసింది. మూడు జిల్లాల్లో 92.38 శాతం మంది తమ ఓటుహక్కును వినియోగించుకున్నారు. బ్యాలెట్ బాక్సులను ఓట్ల లెక్కింపు కేంద్రంమైన విశాఖలోని స్వర్ణభారతి ఇండోర్ స్టేడియానికి తరలిస్తున్నారు. ఇక్కడ ఏర్పాటు చేసిన ్రస్టాంగ్ రూములో వీటిని భద్రపరుస్తారు. 25వ తేదీన ఓట్ల లెక్కింపు జరగనున్నది.ఏడుగురు అభ్యర్థులు పోటీ చేస్తున్న ఉత్తరాంధ్ర ఉపాధ్యాయ ఎమ్మెల్సీ స్థానానికి గురువారం ఎన్నికలు నిర్వహించగా, మూడు జిల్లాల్లో 92.38 శాతం పోలింగ్ నమోదైంది. 14,428 మంది ఓటర్లకుగాను 13,237 మంది ఓటు హక్కు వినియోగించుకున్నట్టు సమాచారం.

విశాఖ జిల్లాలో 6,094 మందికి 5,338 మంది(88 శాతం), విజయనగరంలో 3,723 మందికి 3,513 మంది(94 శాతం), శ్రీకాకుళం జిల్లాలో 4,612 మందికి 4,338 మంది(92 శాతం) ఓట్లు వేశారు. ఉదయం ఎనిమిది గంటలకే పలు పోలింగ్ కేంద్రాలకు వద్ద ఉపాధ్యాయులు వచ్చారు. ఉదయం పది గంటలకు విశాఖలో 23, విజయనగరంలో 30, శ్రీకాకుళంలో 27 శాతం, మధ్యాహ్నం 12 గంటలకు విశాఖలో 62, విజయనగరంలో 68, శ్రీకాకుళంలో 71 శాతం,రెండు గంటలకు విశాఖలో 82, విజయనగరంలో 87, శ్రీకాకుళంలో 86 శాతం, నాలుగు గంటలకు విశాఖలో 88, విజయనగరంలో 94, శ్రీకాకుళంలో 92 శాతం పోలింగ్ జరిగినట్టు అధికారులు తెలిపారు.