Posted: 02/19/2013 09:57 PM IST

సిమ్స్' డిపాజిట్‌దారులకు అన్ని విధాలా న్యాయం చేస్తామని కలెక్టర్ వి.శేషాద్రి హామీ ఇచ్చారు. అఖిలపక్షం ఆధ్వర్యంలో పలువురు నాయకులు కలెక్టర్‌ను సోమవారం ఉదయం కలిసి సిమ్స్ బాధితులకు న్యాయం చేయాలని కోరుతూ వినతిపత్రం అందజేశారు. వారితో పాటు ఎలమంచిలి, అనకాపల్లి ప్రాంతాల నుంచి పలువురు బాధితులు కలెక్టర్‌ను కలిసి తమ డిపాజిట్ల మొత్తాన్ని ఇప్పించాలని కోరారు. ఇందుకు స్పందించిన కలెక్టర్ వేలాది మంది డిపాజిట్ దారులకు సంబంధించిన వ్యవహారాన్ని ప్రభుత్వం దృష్టికి తీసుకెళతానని హామీ ఇచ్చారు.ప్రభుత్వ అనుమతితో సిమ్స్ ఆస్తులను అటాచ్‌మెంట్ చేసి బాధితులకు న్యాయం చేస్తామని భరోసా ఇచ్చారు. అనకాపల్లికి చెందిన పైడిరాజు అనే బాధితుడు కలెక్టర్ వద్ద విలపించారు. నిరుపేద మధ్యతరగతి వర్గాలు తమ ఆస్తులను తాకట్టు పెట్టి సిమ్స్‌లో డిపాజిట్ చేశారని ఎలమంచిలికి చెందిన కొంత మంది బాధితులు వాపోయారు. తమ డిపాజిట్ మొత్తం రాకుంటే ఆత్మహత్యలే శరణ్యమని అన్నారు. కలెక్టర్‌ను కలిసిన అఖిలపక్షంలో సీపీఐ నగర కార్యదర్శి ఎం.పైడిరాజు, టీడీపీ నాయకుడు బైరెడ్డి పోతనరెడ్డి, సీఐటీయూ నాయకుడు ఆర్.పి.రాజు, డీవైఎఫ్ఐ జిల్లా కార్యదర్శి వి.వి.శ్రీనివాసరావు, సిమ్స్ బాధితుల అసోసియేషన్ సంఘం తరపున గిద్దా శ్రీనివాసనాయుడు తదితరులు వున్నారు.