Posted: 01/23/2013 04:00 PM IST

విశాఖపట్నం గగన విహారం చేస్తోంది. విమాన ప్రయాణాల్లో సరికొత్త రికార్డులు సృష్టిస్తోంది. ఒక్క డిసెంబర్ నెలలోనే విశాఖపట్నం విమానాశ్రయం నుంచి ప్రయాణించిన వారి సంఖ్య అక్షరాలా లక్ష దాటిపోయింది. ఇది సరికొత్త రికార్డు. విమానాల సంఖ్య పెరుగుతుంటే...ప్రయాణికులు పెరగకుంటే.. తగ్గుతారా? అని అనుకుంటే పప్పులో కాలేసినట్టే. విశాఖకు రోజూ మొత్తం 22 విమానాలు వచ్చిపోతుండగా ఇటీవల వాటి సంఖ్య 17కి పడిపోయింది. జెట్ ఎయిర్‌వేస్ పలు కారణాల వల్ల ఐదు సర్వీసులను రద్దుచేసింది. ఢిల్లీ, కోల్‌కతా, చెన్నై, బెంగుళూరు, హైదరాబాద్‌లకు సర్వీసులు నిలిపివేసింది. కేవలం రెండింటినే కొనసాగిస్తోంది.అటువంటి నేపథ్యంలో ప్రయాణికులు పెరగడమే ఇక్కడ విశేషం. అంతర్జాతీయ విమానాలు దుబాయ్, సింగపూర్‌లకు విమానాలు వచ్చాయి కాబట్టి సంఖ్య లక్ష దాటి ఉండవచ్చని భావించినా పొరపాటే. అంతర్జాతీయ ప్రయాణికుల సంఖ్య గత మార్చి నుంచి డిసెంబర్ 16 వరకు 25 వేలు దాటింది. దుబాయ్ విమానం మార్చిలో ప్రారంభం కాగా, సింగపూర్ విమానం అక్టోబర్ 28న గాల్లోకి లేచింది. దుబాయ్‌కి గత పది నెలల్లో 22,429 మంది రాకపోకలు సాగించగా, రెండు నెలల్లో సింగపూర్‌కి 3,630 మంది వెళ్లివచ్చారు.