Posted: 01/12/2013 12:32 PM IST

        ఇక... ఆడవాళ్లపై కన్నెత్తి చూడాలన్నా భయపడాల్సిందే! 'చీకటి మాటున చేశా. నన్ను ఎవరు పట్టుకుంటారులే' అనే భ్రమల్లోంచి నేరగాళ్లు బయటికి రావాల్సిందే! లైంగిక వేధింపులు, అత్యాచార కేసుల్లో నిందితులు తప్పించుకోకుండా 'ఆధారాల ఉచ్చు' బిగిస్తున్నారు. రేప్ చేసిన వాడెవడైనా సరే... జైలుకు వెళ్లేలా 35 అంశాలతో కూడిన ఓ జాబితా రూపొందించి దానిని పోలీసు స్టేషన్లకు పంపించనున్నారు. గత కొన్నేళ్లుగా మహిళలపై అత్యాచారాల సంఖ్య పెరుగుతున్నా... శిక్షల శాతం బాగా తగ్గుతోంది. నేరాల రుజువు మన రాష్ట్రంలో జాతీయ సగటుకన్నా 14 శాతం తక్కువగా ఉంది. దర్యాప్తులో లోపాలవల్లే శిక్షలు సరిగా పడటంలేదని అధికారుల పరిశీలనలో తేలింది.
       ‘ఉద్దేశపూర్వకంగాకానీ, పొరపాటునకానీ ఏ అంశాన్నీ వదిలిపెట్టే ప్రసక్తే ఉండదు. ఫలితంగా ప్రాసిక్యూషన్‌కు బలం చేకూరి బాధితురాలికి న్యాయం జరుగుతుంది. నేరం చేసిన వారికి శిక్ష పడుతుంది.  రేప్ కేసుల్లో శిక్షల శాతం పెరిగేలా జాగ్రత్తలు తీసుకున్నాం. మార్చి 31లోపు రాష్ట్రంలోని అన్ని పోలీస్ స్టేషన్లకూ కంప్యూటర్లు అందిస్తాం. 31లోపు 98 శాతం ఠాణాలను సీసీటీఎన్ఎస్‌కు అనుసంధానిస్తాం. ఎక్కడ నేరం జరిగినా కంప్యూటర్ నుంచి సదరు ప్రొఫార్మా ప్రింట్ తీసుకొని నేరస్థలానికి వెళితే... కానిస్టేబుల్ కూడా సమగ్రంగా వివరాలను సేకరించే అవకాశం ఉంటుంది’ అని పోలీసు శాఖ టెక్నికల్ సర్వీసెస్ ఐజీ అంజనీ కుమార్ తెలిపారు.
         ప్రస్తుతానికి మహిళలకు సంబంధించిన అన్ని కేసుల్లోనూ (అత్యాచారం, గృహహింస, ఆత్మహత్య, దాడి) ప్రొఫార్మా సిద్ధం చేశామని, త్వరలోనే ఇతర నేరాలపైనా ఇలాంటి జాబితా సిద్ధం చేస్తామని వివరించారు. ఈ ప్రొఫార్మాలోని అంశాలను పూరిస్తే కేసు 90శాతం నిలబడుతుందన్నారు. దేశంలో మన రాష్ట్రంలోనే మొట్టమొదటిసారిగా ఈ విధానం అమలులోకి వస్తోందని ఆయన చెప్పారు.

...avnk