Posted: 02/02/2013 01:15 PM IST

        కాంగ్రెస్‌ను వీడి జగన్‌తో జత కట్టేందుకు సిద్ధమైన తమ పార్టీ ఎమ్మెల్యేలపై ఎట్టకేలకు పీసీసీ నడుంకట్టింది. రాష్ట్ర వ్యాప్తంగా తొమ్మిది మంది ఎమ్మెల్యేలను సస్పెండ్ చేస్తున్నట్టు వార్తలొచ్చాయి. దీనిపై జిల్లాలో కలకలం రేగింది. పీసీసీ ప్రకటనలో మచిలీపట్నం, పెడన ఎమ్మెల్యేల పేర్లు ఉండడం ఇందుకు కారణం. జనవరి 24న జగన్‌ను కలిసిన పేర్ని ఆ వెంటనే తన నిర్ణయాన్ని హైదరాబాద్‌లో ప్రకటించారు. ఇకపై తాను జగన్‌కు మద్దతుగా ఉంటానని చెప్పారు. దానిలో భాగంగానే పార్టీకి, ప్రభుత్వ విప్ పదవికి రాజీనామా చేస్తున్నట్టు చెప్పారు. అప్పటి నుంచి పార్టీకి దూరంగానే ఉంటున్న ఆయన్ను ఇటీవల ఉప సభాపతి మల్లు భట్టి విక్రమార్క కలిసి వెళ్ళారు. ఈ కలయిక స్నేహ పూర్వకమే అయినప్పటికీ రాజకీయ ప్రాధాన్యత సంతరించుకుంది.        పేర్నిపై సస్పెండ్‌కు సిద్ధ్దమైన పీసీసీ.. పెడన ఎమ్మెల్యే జోగి రమేష్‌కు షోకాజ్ నోటీసు ఇవ్వవచ్చని తెలుస్తోంది. పార్టీకి వ్యతిరేకంగా మాట్లాడుతున్నందుకే జోగిపై చర్యలు తీసుకుంటున్నట్టు పీసీసీ భావిస్తుందని సమాచారం. 
      ఇదిలా ఉంటే..  పేర్ని తాను రాజీనామా చేసి పది రోజులవుతుంటే నన్ను సస్పెండ్ చేయటం ఏమిటని ఎమ్మెల్యే పేర్నినాని ఆక్షేపణ వ్యక్తం చేశారు. గత నెల 24నే కాంగ్రెస్ పార్టీకీ, ప్రభుత్వ విప్ పదవికి రాజీనామా చేయడం జరిగిందన్నారు. దాన్ని పరిగణలోకి తీసుకోకుండా పీసీసీ అధ్యక్షుడు ప్రకటన చేస్తే తానేమీ చేసేది లేదన్నారు. వారు ఆ విధంగా తృప్తి పడుతున్నారని భావించడమేనన్నారు.
       కాగా,  కాంగ్రెస్ పార్టీ నీడలో పెరిగి, అనేక పదవులు పొంది క్రమశిక్షణా రాహిత్యంగా ప్రవర్తించిన ఏ నాయకుడిపైన చర్యలు తీసుకున్నా తప్పులేదని కాంగ్రెస్ పార్టీ జిల్లా అధ్యక్షుడు నరహరశెట్టి నరసింహారావు అన్నారు.

...avnk