సాధారణంగా ప్రేమ వ్యవహారాలు స్నేహం నుంచే మొదలవుతాయి. ఎవరైనా ఒకరు నచ్చినప్పుడు వారితో ముందుగా స్నేహం చేసుకుంటారు. ఆ తరువాత తమలో వున్న భావాలను, ఇష్టాయిష్టాలను తెలుసుకుని, అనుకోకుండా ప్రేమలో పడిపోతారు. 

ఇటువంటి వ్యవహారాలు చాలావరకు కాలేజీ విద్యార్థుల మధ్యే ఎక్కువగా జరుగుతుంటాయి. ముఖ్యంగా అబ్బాయిల విషయం అయితే చాలా గందరగోళంగా వుంటుంది. నచ్చిన అమ్మాయికి తమలో వున్న ప్రేమను వ్యక్తపరచడానికి రకరకాల పద్ధతులను అనుసరిస్తుంటారు. అమ్మాయిలు ఎక్కడికివెళితే అక్కడ వెంబడిస్తుంటారు. అమ్మాయిలకు నచ్చిన విధంగా తమను తాము మార్చుకుంటారు. 

ఇటువంటి ప్రయత్నాలలో కొందరు విజయాన్ని సాధిస్తారు. అంటే... తమ ప్రేమను వ్యక్తపరిచి అమ్మాయిల మనసులను గెలుచుకుంటారు. మరికొందరు విఫలమవుతుంటారు. తమలో వున్న భావాలను ఎలా వ్యక్తపరచాలో తెలియక డైరెక్ట్ గా వెళ్లి అమ్మాయిలను ప్రపోజ్ చేసేస్తారు. ఒకవేళ వారికి నచ్చితే ఫరువాలేదు కానీ.. నచ్చకపోతే తీవ్ర అవమానాన్ని ఎదుర్కోవాల్సి వస్తుంది. 

కొంతమంది అబ్బాయిలు తమలో వున్న ప్రేమానుభావాలను అమ్మాయితో చెప్పుకోలేక తలమునకలయిపోతుంటారు. వారితో కలవడానికి కూడా ఇబ్బంది పడుతుంటారు. తమ ప్రేమ గురించి వ్యక్తపరచడానికి ధైర్యం చాలక వాటిని మనసులోనే దాచుకుని వుండిపోతారు. 

అయితే అటువంటి వారికోసం కొన్ని చిట్కాలను అందిస్తున్నాం.. ఒక్కసారి ట్రై చేసి చూడండి...

1. మీరు ప్రేమిస్తున్న అమ్మాయికి మీ మనసులోని భావాలను వ్యక్తపరిచే ముందు ఏదైనా ఒక ప్రశాంతంగా వుండే స్థలాన్ని ఎంచుకుంటే మంచిది. అటువంటి ప్రశాంత వాతావరణంలోనే ఇతరుల మనుసులో వున్న భావాలను తేలికగా అర్థం చేసుకోవచ్చు. అప్పుడు మీలో వున్న భావాలను వ్యక్తపరిస్తే ఫలితం దక్కవచ్చు. 

2. మీరు ప్రేమిస్తున్న అమ్మాయి గురించిగాని, ప్రేమ వ్యవహారం గురించి కాని స్నేహితులతో ఎట్టి పరిస్థితుల్లో తెలియనివ్వకుండా జాగ్రత్త తీసుకుంటే మంచిది. ఎందుకంటే కొంతమంది అమ్మాయిలు.. తమ ప్రేమ వ్యవహారాలను స్నేహితుల నుంచి తెలుసుకోవడం ఇష్టపడరు. పైగా వారు కోపాద్రిక్తులై మీ ప్రేమను తిరస్కరించవచ్చు. 

3. ప్రస్తుత జనరేషన్ లో ప్రతిఒక్కరు తమ ప్రేమ వ్యవహారాలను సెల్ ఫోన్ ల ద్వారా, సోషల్ నెట్ వర్కింగ్ ద్వారా వ్యక్తపరుచుకుంటారు. అయితే ఇది ఎంతమాత్రం మంచిది కాదు. సాధ్యమైనంతవరకు లేఖ రాయడానికి ఆసక్తి చూపించండి. ఎందుకంటే.. ఒక కాగితంలో రాసే మనసులోని భావాలు ఇతరులు త్వరగా ఆకర్షితులవుతారు. పూర్వం ప్రేమ వ్యవహారాలు ఇలాగే ఎక్కువగా జరిగేవి. అందులో వారు విజయాన్ని కూడా సాధించేవారు. కాగితంలో రాసే అక్షరాలు మనసులో దాగి వున్న ప్రేమలోతును పూర్తిగా అర్థం చేసుకోవడానికి చాలా వీలుగా వుంటుంది. 

4. కొందరు తమ ప్రేమను వ్యక్తపరుచుకోవడానికి సినిమాల్లో వున్న హీరోల్లాగా తయారయి రావడం, వారి సినిమాల్లో వుండే ప్రేమ మాటలు చెప్పడం చేస్తుంటారు. అయితే అమ్మాయిలకు ఇది ఎంతమాత్రం నచ్చదు. మీరు మీరుగానే వుండి మీలో వున్న భావాలను వ్యక్తపరిస్తేనే చాలామంచిది. అమ్మాయిలు కూడా అటువంటివాళ్లనే ఇష్టపడతారు. అనవసరమైన విచిత్రచేష్టలు చేయకుండా మీకు మీరుగానే మీ మనసులోని భావాలను వ్యక్తపరిచేందుకు ట్రై చేయండి.