ఆధ్యాత్మికతలో 108వ సంఖ్య ప్రాధాన్యత ఏంటి..?

Posted: 02/25/2014 05:42 PM IST

హిందూ సంస్కృతి, సంప్రదాయాల ప్రకారం 108వ సంఖ్యకు ప్రత్యేక స్థానం ఉంది. ఆధ్యాత్మిక కార్యకలాపాల్లో ఉపయోగించే నిత్యం ఉపయోగించే పవిత్ర మాలలో కూడా 108 పూసలు వుంటాయి. 

ఇలా ఒక్క హిందూ సంప్రదాయంలోనే కాదు.... బౌద్ధ, సిక్కు, జైన మతాచారాల్లోసైతం ఈ సంఖ్యకు చాలా ప్రాధాన్యం ఉంది. హిందూ సంస్కృతిలో మంత్రోచ్ఛరణను 108 సార్లు చేయడం ఆచారం. జపాన్‌లోని జైన దేవాలయాల్లో కొత్త సంవత్సరం ఆరంభం నాడు 108 సార్లు గంటలు కొడతారు. 

అయితే ఈ 108వ సంఖ్యకు ఎక్కువ ప్రాధాన్యతనివ్వడానికి గల కారణాలు వేరే వున్నాయి. అవేమిటంటే.. మన ప్రాచీన ఋషులు గొప్ప గణాంకవేత్తలు. నిజానికి మన సంఖ్యావ్యవస్థను కూడా గుర్తించిందివారే. అటువంటి విద్యావేత్తలయిన ఋషులే ఈ సంఖ్యకు ప్రాధాన్యతను సంతిరించిపెట్టారు. 

సాధారణంగా తొమ్మిది (9) సంఖ్య పరిపూర్ణత్వాన్ని ప్రతిబింబిస్తుంది. 108ని కూడితే (1+0+8=9) వచ్చేది తొమ్మిది. అంతేకాదు ఏ సంఖ్యను 9 సార్లు హెచ్చించి, కూడినా వచ్చే సంఖ్య తొమ్మిదే. 

అంతరిక్షంలో తొమ్మిది గ్రహాలు 12 రాశుల గుండా ప్రయాణిస్తాయి. వాటిని గుణించగా అంటే 9x12= 108 వస్తుంది. 

27 నక్షత్రాలలో ఒక్కోదానికి నాలుగు పాదాలుంటాయి. 27 నక్షత్రాలు అగ్ని, భూమి, గాలి, నీరు అన్న నాలుగు అంశాలపై విస్తరించి వుంటాయి. అంటే 27x4=108. 

ప్రాచీనకాలంనాటి తాళపత్ర గ్రంథాల్ని అనుసరించి విశ్వం 108 అంశాల కలయికతో ఏర్పడింది.