హైపర్ టెన్షన్ ను తగ్గించే ఆరోగ్య చిట్కాలు

Posted: 11/06/2015 12:27 PM IST

Healthy tips to control hypertension problem home remedies

ఆధునిక యుగంతో పరుగులు పెడుతున్న నేటి ప్రజలు అధిక రక్తపోటు సమస్య బారిన పడుతున్నారు. కాలక్రమంలో వీరి సంఖ్య మరింత పెరుగుతూ వస్తోంది. దీని నుంచి ఎంత వీలైతే అంత త్వరగా ఉపశమనం పొందేలా మార్గాలు అన్వేషించాల్సి వుంటుంది. లేకపోతే.. ప్రాణం పోయే ప్రమాదం కూడా వుంటుంది. ఈ నేపథ్యంలోనే నిపుణులు దీనిని కంట్రోల్ చేసేందుకు వీలుగా కొన్ని చిట్కాలు పాటించాల్సిందిగా సూచిస్తున్నారు. ఆ చిట్కాలేంటో తెలుసుకుందామా..

హైపర్ టెన్షన్ తగ్గాలంటే.. బీట్ రూట్ రసం తాగాల్సిందే అంటున్నారు పరిశోధకులు. అధిక రక్తపోటు ఉన్నవారిలో కొందరికి మాత్రలకు బదులుగా 200 మి.లీ బీట్‌రూట్‌ రసాన్ని ఇచ్చి 24 గంటలపాటు పరిశీలనలో ఉంచారు. ఆ రసం తీసుకున్న కేవలం మూడు నుంచి ఆరు గంటల్లోనే 10 ఎంఎంహెచ్‌జి రక్తపోటు తగ్గిందని వారి పరిశోధనలో వెల్లడైంది. పైగా ఆ రసం ప్రభావంతో అధిక రక్తపోటు 24 గంటల దాకా నియంత్రణలోనే ఉన్నట్టు తేలింది. అందువల్ల అధిక రక్తపోటు సమస్య ఉన్నవారు నైట్రేట్‌ సమృద్ధిగా ఉన్న కూరగాయలు ఆకుకూరలు తరుచుగా తీసుకోవడం ద్వారా తమ రక్తపోటును నియంత్రణలో ఉంచుకోవచ్చని పరిశోధకులు వెల్లడించారు.

అంతేకాకుండా, నైట్రేట్‌ సమృద్ధిగా ఉండే కూరగాయల్లోని నైట్రేట్‌లో అధిక రక్తపోటును తగ్గించేందుకు తోడ్పడే అంశాలున్నాయని స్పష్టమయ్యింది. మన శరీరంలో ఆహారంలోని నైట్రేట్‌ను నైట్రిట్‌ అనే రసాయనంగా ఆ తర్వాత నైట్రిక్‌ ఆక్సైడ్‌గా మార్చే గుణం ఉంది. దీనికి రక్తనాళాలను వ్యాకోచింపచేసి రక్తపోటును తగ్గించే గుణం ఉందని వివరించారు. కాబట్టి.. నిపుణులు సూచించిన చిట్కాలను పాటిస్తే.. రక్తపోటు సమస్యను కంట్రోల్ లో వుంచుకోవచ్చు.