ఆరోగ్యకరమైన ఆహారంతో అల్సర్ కు చెక్

Posted: 08/27/2015 12:23 PM IST

కడుపులో నొప్పి, తీవ్రమైన మంట, ఇంకా ఇతర కడుపు సంబంధిత వ్యాధులు వస్తే వాటిని ‘అల్సర్’గా గుర్తిస్తారు. సమయానికి భోజనం తినకపోవడం వల్లే ఈ సమస్య బారిన పడాల్సి వస్తుంది. కొన్ని సందర్భాలలో ఎక్కువ కారంగా వుండే పదార్థాలు తినడం వలన కూడా అల్సర్ ఏర్పడుతుందని వైద్యులు తెలుపుతున్నారు. ఈ వ్యాధి వచ్చినప్పుడుల్లా తీవ్ర నొప్పిని భరించాల్సి వస్తుంది. ఎంతో బాధ కలిగించే ఈ సమస్య నుంచి వెంటనే ఉపశమనం పొందాలంటే.. ఆరోగ్యకరమైన ఆహారమే మంచి మందు అని నిపుణులు అంటున్నారు. మరి.. ఆ ఆహారాలేంటో తెలుసుకుందామా...

అరటి పండ్లు కడుపులోని అల్సర్లకు మంచి ఔషధంగా పనిచేస్తాయి. వీటిలో ఉండే యాంటీ బ్యాక్టీరియల్ పదార్థం కడుపులో వచ్చే పుండ్లు పెరగకుండా చేస్తుంది. విటమిన్ పుష్టిగా దొరికే బాధం, చేపలు వంటివి కూడా అల్సర్లను దరిచేరనీయ్యవు. యాంటీ బ్యాక్టీరియల్ గుణాలుండే కొబ్బరి నూనె వాడడం వల్ల కడుపులో వచ్చే పుండ్లు మానతాయి. అందుకే వెజిటబుల్ ఆయిల్స్‌కి బదులుగా కొబ్బరి నూనె వాడడం మంచిది. బత్తాయి, నిమ్మ, ద్రాక్ష వంటి పండ్ల రసాలను తాగడం ద్వారా అల్సర్ల నొప్పి నుంచి బయటపడొచ్చు. వెల్లుల్లి తినడం వల్ల ఉపశమనాన్ని పొందవచ్చు. వెల్లుల్లికి కడుపు మంటని తగ్గించే గుణం ఉంటుంది. భోజన సమయంలో కొంచెం వెల్లుల్లి తింటే కూడా అల్సర్ తగ్గుతుంది.

ఒక కప్పు మెంతికూర ఆకులను నీళ్లలో బాగా ఉడికించుకోవాలి. అందులో కొద్దిగా ఉప్పు చేర్చి... ఆ నీటిని గోరు వెచ్చగా చేసి ప్రతి రోజూ రెండు సార్లు తాగాలి. ఇలా చేస్తే ఎటువంటి అల్సర్ అయినా మటుమాయమవుతుంది. ఈ విధంగానే క్యాబేజీ రసం తాగడం వల్ల కూడా కడుపులోని అల్సర్లు త్వరగా తగ్గిపోతాయి. అయితే ఈ రసాన్ని పడుకోబోయే ముందు తాగాలి. అలాగే ప్రతి రోజూ పొద్దున్నే అల్పాహారంతోపాటు ఒక చెంచా తేనె తాగితే.. ఈ సమస్య నుంచి విముక్తి పొందవచ్చు.