మునక్కాయా మజాకా..?

Posted: 06/22/2015 03:27 PM IST

Munaga leaves drumsticks health benefits home remedies

సాధారణంగా ప్రతిఒక్కరి నిత్యజీవితంలో అనేక వ్యాధులు సంభవిస్తుంటాయి. దగ్గు, జలుబు, నొప్పులు.. ఇలా ఎన్నోరకాల చిరువ్యాధులు నిత్యం వెంటాడుతూనే వుంటాయి. ఇటువంటి సమస్యల నుంచి తక్షణమే ఉపశమనం పొందాలంటే ప్రతీసారి ‘క్లినిక్’కి వెళ్ళాల్సిన అవసరం లేదని ఆరోగ్య నిపుణులు అంటున్నారు. ఎందుకంటే.. అటువంటి వ్యాధులను నయం చేసే శక్తి ‘మునక్కాయ’లో వుందని వారంటున్నారు. కొన్ని వందల శారీరక రుగ్మతలు ‘మునగ’వల్ల నయమవుతాయని కొన్ని పరిశోధనలు స్పష్టం చేశాయి. అందుకే.. నిత్యం ఆరోగ్యంగా వుండాలంటే ‘మునగ’ తీసుకోవడం ఎంతో శ్రేయస్కరమని నిపుణులు సలహా ఇస్తున్నారు.

ఆరోగ్యంగా జీవించడానికి కావలసిన అన్నిరకాల పోషక పదార్థాలు ‘మునగ’లో పుష్కలంగా వున్నాయి. విటమిన్‌ ఎ, సి, క్యాల్షియం, పొటాషియం వంటి పోషకాలు ఇందులో ఎక్కువ మోతాదులో నిల్వవుంటాయి. అవి వివిధ రకాల వ్యాధులతో పోరాడి, ఆరోగ్యాన్ని మెరుగుపర్చడంలో కీలకపాత్ర పోషిస్తాయి. కేవలం మునక్కాయలోనే కాదు.. మునగ ఆకుల్లో కూడా ఎన్నో పోషకాలు వుంటాయి. అందుకే.. వాటిని వంటల్లో వినియోగిస్తారు. పచ్చటి ఆకులే కాక కొంచెం నీడలో ఎండబెట్టి, పొడిచేసి నిలువ కూడా వుంచుకోవచ్చు. అవసరమైనపుడు సంవత్సరం పొడవునా అందుబాటులో వుంటుంది. అయితే.. ఇలా పొడిచేసిన ఆకుల్లో సి విటమిన్‌ తప్ప మిగిలిన పోషకాలేవీ నశించవు.. తగ్గవు. వందగ్రాముల ఆకుల్లో కాల్షియం - 440 మిల్లీ గ్రాములు, ఇనుము- 0.85 మి.గ్రా, బీటా కెరోటీన్లు అధికంగా వుంటాయి.

మునక్కాయ ఎముకల్ని బలంగా ఉంచుతుంది. ఇందులో ఐరన్, క్యాల్షియం ఎముకల్ని బలపరుస్తుంది. పిల్లల పెరుగుదలకు ఇవి ఎంతగానో ఉపయోగపడతాయి. ఇంకా చక్కెర స్థాయిల్ని స్థిరంగా ఉంచుతుంది. తద్వారా డయాబెటిస్‌ను నియంత్రించుకోవచ్చు. వీటిలోని విటమిన్ సి ఇన్ఫెక్షన్లను దూరం చేస్తుంది. లైంగిక వ్యాధులను దూరం చేయడంతోపాటు లైంగిక సామర్థ్యాన్ని మునక్కాయ పెంచుతుందని ఆరోగ్య నిపుణులు అంటున్నారు. కాబట్టి.. రెగ్యులర్ డైట్ లో మునగను చేర్చుకుంటే.. ఎన్నో ఆరోగ్య ప్రయోజనాలు పొందవచ్చు.