బట్టతలను నివారించే చిట్కాలు

Posted: 03/06/2014 11:37 AM IST

పురుషులలో సాధారణంగా జుట్టు రాలే సమస్య అత్యధికంగా వుంటుంది. ఇలా రాలడం వల్ల వాళ్లలో ఏదో ఒక కొరతాగా, లోపంగా వున్నట్లు, రకరకాల భావాలు వారి మనసులో రేకెత్తుతుంటాయి. దీంతో వారు తీవ్రంగా ఆందోళన చెందుతారు. 

బట్టతల అనేది జన్యపరంగాను లేదా వంశపారంపర్యంగా వచ్చే సమస్య. కొందరికైతే ఈ సమస్య చాలా త్వరగా వస్తుంది... మరికొందరికైతే వృద్ధాప్య దశలో వస్తుంది. వయస్సు పెరుగుతున్నకొద్దీ హార్మోన్ల లోపం వల్ల ఈ సమస్య ఏర్పడడం సహజమే అంటున్నారు నిపుణులు. 

శాస్త్రీయపరంగా చెప్పుకోవాలంటే.. పురుషులలో వుండే ‘‘టెస్టోస్టిరాన్’’ హార్మోన్ వల్ల బట్టతల ఎక్కువగా సంభవిస్తుంది. జన్యుపరమైన కారణాలవల్ల ఈ హార్మోన్ తలమీద వున్న చర్మంలో ‘‘డీ హైడ్రో టెస్టోస్టిరాన్’’గా మారుతూ.. వేకంగా జుట్టు రాలడానికి కారణం అవుతుందని నిపుణులు పేర్కొంటున్నారు. 

ఈ బట్టతలను నివారించడానికి కొన్ని చిట్కాలను మనకు నిపుణులు అందిస్తున్నారు. అవి... 

ఒక గిన్నెలో గుడ్డుపచ్చసొన, తేనె మిక్స్ చేసిన ఒక మిశ్రమాన్ని తలకు బాగా పట్టించి మసాజ్ చేసుకోవాలి. అరగంట తరువాత గోరువెచ్చని నీటితో స్నానం చేసుకోవాలి. 

నీటిలో నానబెట్టిన మెంతులను మిక్సీలో వేసి పేస్ట్ చేసుకోవాలి. దీన్ని తలకు బాగా పట్టించి, చన్నీటితో తలస్నానం చేసుకోవాలి. ఇలా తరుచుగా చేస్తే.. ఫలితం లభిస్తుందని చెబుతున్నారు. 

ముఖ్యంగా బట్టతల రావడానికి కారణం ‘‘ఆహారంలో సమతుల్యత లేకపోవడం’’ అంటున్నారు నిపుణులు. అందుకే సాధ్యమైనంతవరకు కాల్షియ, మెగ్నీషియం, జింక్ వంటి పోషకాలు ఎక్కువగా వున్న ఆహారాన్ని తీసుకోవాలని అంటున్నారు. అలాగే జుట్టు తడిగా వున్నప్పుడు దువ్వకూడదు అంటున్నారు. 

ఒక కప్పు ఆవ నూనె (మస్టర్డ్ నూనె)లో నాలుగు చెంచాల గోరింటాకులను వేసి, గోరువెచ్చగా కాచుకొని నిల్వవుంచుకోవాలి. దీనిని తరుచుగా తలకు పట్టించి, మసాజ్ చేసుకుంటే.. కొన్ని వారాలలో ఫలితం లభిస్తుందని చెబుతున్నారు. 

బట్టతల ఏర్పడుతున్న ప్రదేశంలో ఉల్లిపాయ పేస్ట్ లో కొంచెం తేనె కలుపుకుని మసాజ్ చేసుకోవాలి. అరగంట తర్వాత స్నానం చేసుకోవాలి. ఇది రెగ్యులర్ గా చేసుకుంటే మంచింది. 

హోంమేడ్ షాంపు.. ఇది రెండు చెంచాల పెరుగు, రెండు చెంచాల శెనగపిండి, ఒక చెంచా నిమ్మరసంతో కలిపి చేసుకునే మిశ్రమం. దీన్ని తలకు బాగా పట్టించి, గంటన్నర తరువాత స్నానం చేసుకోవాలి. ఇది ఎంతో ఎఫెక్టివ్ గా పనిచేస్తుందని నిపుణులు చెబుతున్నారు. 

ఆమ్లా, శీకాకాయ్, రీలా మొదలైనవాటిని ఒక గిన్నెలో వేసి, రెండు లీటర్ల నీళ్లు పోసి బాగా ఉడికించాలి. దీనిని కొబ్బరినూనె లేదా అలోవేరా జెల్ తో మిక్స్ చేసి తలకు పట్టించి, మసాజ్ చేసుకోవాలి. ఇలా నాలుగుసార్లు చేస్తే మంచి ఫలితం లభిస్తుందని నిపుణులు చెబుతున్నారు.