ప్రస్తుతకాలంలో ప్రతిఒక్క బ్యాంకు అన్ని రకాలుగా రుణసౌకర్యాలను కల్పిస్తున్నాయి. బంగారు మీద రుణం, ఇంటికి సంబంధించిన లోన్స్, ఇంకా ఇతరత్ర రుణాలను బ్యాంకులు ప్రతిఒక్కరికీ అందుబాటులో వుండేలా చేస్తున్నాయి. 

అయితే బ్యాంకులు రుణాలు ఇస్తున్నాయి కదా అని ఎప్పుడుపడితే అప్పుడు అప్పులు తీసుకోవడం చాలా ప్రమాదకరం. ఎందుకంటే... భవిష్యత్ లో మన ఆరోగ్య పరిస్థితులు దెబ్బతినడం వల్ల దాచుకున్న డబ్బును మొత్తం వెచ్చించాల్సి వుంటుంది. అప్పుడు బ్యాంకులకు కట్టాల్సిన నెలసరి ఈఎంఐలు వాయిదా వేసుకోవాల్సి వుంటుంది. ఒకటి లేదా రెండు నెలల వరకు అయితే బ్యాంకులవారు కూడా అందుకు సహకరిస్తారు. అలా కాని పక్షంలో తీవ్ర నష్టాలను, ఇబ్బందులను ఎదుర్కోవాల్సి వుంటుంది. అలాగే చేస్తున్న ఉద్యోగాలు కూడా ఎంతకాలం వుంటాయో ఎవ్వరికీ తెలియదు. 

మరికొంతమంది బ్యాంకులనుంచి అప్పులు తీసుకొని పెట్టుబడులు పెడుతుంటారు. అటువంటి సమయాల్లో మార్కెట్లో ధరల ప్రభావం తగ్గడం జరిగితే అప్పుడు తీసుకున్న అప్పులకు రుణాలు కట్టలేక వాయిదాలు వేసుకోవాల్సి వస్తుంది. పైగా ఇంకా అదనపు అప్పులను చేసుకోవాల్సి వస్తుంది. దీంతో వారు బ్యాంకులకు తమ మొహాలను చాటేస్తారు. ఇటువంటి సమయాల్లో బ్యాంకులు వారి ఆస్తులను జప్తు చేసి వాటిని వేలానికి వేసే అధికారం వుంటుంది. కాబట్టి ఎటువంటి తొందరపాటు చర్యలు తీసుకోకుండా అప్పులు తీసుకునేముందు ఒకటికి రెండుసార్లు ఆలోచించాలంటున్నారు నిపుణులు. 

ముందుగా.. ఎవరైనా అప్పు తీసుకునే యోచనలో వుంటే దానికి సంబంధించిన ప్రణాళికలను ముందే సిద్ధం చేసుకుని వుంచుకోవాలి. మనకు ఆరోగ్యపరంగా కానీ, ఆర్థికపరంగా కానీ ఇబ్బందులు వచ్చినా కూడా బ్యాంకుల రుణాలు నిలుపుకోకుండా వెచ్చించడానికి వేరే పద్ధతులను ముందుగానే ఆలోచించుకోవాలి. ఒకవేళ అలా కుదరకపోతే... మీ ఇబ్బందులను బ్యాంకులవారికి తెలియజేయండి. దీనికి సంబంధించి వారు మీకు సలహాలతో పాటు.. రుణాలను తీర్చేందుకు కొంత సమయం ఇచ్చే అవకాశం వుంటుంది. 

అప్పుల భారాన్ని తగ్గించుకునే చిట్కాలు....

సాధారణంగా బ్యాంకులలో రుణాలు నెలసరి ఈఎంఐ పద్ధతుల ద్వారా కేటాయిస్తారు. అలా మీరు తీసుకున్న రుణాలకు సంబంధించి ఈఎంఐలు ఎక్కువగా అనిపిస్తే.. ఆ విషయాన్ని బ్యాంకులవారికి తెలియజేస్తే చాలా మంచిది. దీంతో వారు రుణాన్ని రీషెడ్యూల్ చేసి ఈఎంఐల వ్యవధి పెంచే అవకాశం వుంటుంది. అయితే ఈఎంఐల కాలవ్యవధిని పెంచుకోవడం వల్ల వడ్డీ ఎక్కువగా పడుతుంది. కానీ అప్పుడప్పుడు మీకొచ్చే కొన్నికష్టాలనుంచి గట్టెక్కడానికి ఇది చాలా ఉపయోగకరం. ఒకవేళ మీరు కష్టాలనుంచి తేరుకుని ఒకేసారి రుణాన్ని తీర్చాలన్న తీర్చుకోవచ్చు. 

కొన్ని కొన్ని సమయాల్లో ప్రతిఒక్కరికి ఆర్థిక పరిస్థితులు దెబ్బతింటాయి. అటువంటి సమయాల్లో మీరు తీసుకున్న బ్యాంకు రుణాలను ఒకేసారి కట్టాల్సిందిగా బ్యాంకులవారు ఒత్తిడి చేయొచ్చు. ఇలాంటి సమయాల్లో బ్యాంకులవారితో ఎటువంటి బేరసారాలు కొనసాగించుకోకుండా... మీరు తీసుకున్న రుసుములను రద్దు చేయించుకుంటే మంచిది. అదేవిధంగా కొన్ని సందర్భాల్లో డబ్బు మొత్తాన్ని వెచ్చించడానికి కుదరదు కాబట్టి... అప్పుడప్పుడు కొద్దికొద్దిగా చెల్లించాల్సిందిగా కోరుకోవచ్చు. 

వాహన రుణాలు తీసుకున్న తరువాత మూడు లేదా నాలుగు నెలలపాటు చెల్లించకపోతే.. బ్యాంకులవారు 7 నుంచి 15 రోజుల దాకా నోటీసులను పంపిస్తుంటారు. వాటిని ఖాతరు చేయకపోతే అవి బండిని స్వాధీనం చేసుకుంటాయి. అటువంటి సమయాల్లో మనం వారిని కొద్ది సమయం కేటాయించాల్సిందిగా కోరుకోవచ్చు. 

నష్టాలు... లాభాలు....

బ్యాంకు రుణాలు చెల్లించకపోవడం వల్ల బ్యాంకులవారు మన ఆస్తులను జప్తు చేసుకుంటారు. దీంతో మనకు ఏ ఇతర బ్యాంకు అప్పులు ఇవ్వవు. ఒకవేళ ఇచ్చినా... వడ్డీరేటును ఎక్కువగా పెంచి ఇవ్వొచ్చు. దీంతో మనమెలాగే తీసుకోలేం. కాబట్టి సాధ్యమైనంతవరకు తీర్చడానికే ప్రయత్నించండి.