మహేష్ 1 విషయంలో సెన్సార్ బోర్డ్ చెయ్యని పని

Posted: 01/11/2014 10:03 AM IST

సెన్సార్ బోర్డ్ ఏమాత్రం కట్ చెయ్యకుండా మహేష్ బాబు చిత్రం 1- నేనొక్కడినే కి యుఏ సర్టిఫికేట్ ఇచ్చింది.  అయితే నిర్మాతలు మాత్రం దాన్ని కట్ చేసి కుదిస్తున్నారు!  సినిమా విజయవంతమైతే ప్రేక్షకులకు కృతజ్ఞతగానో లేకపోతే మరింత ఆకర్షించటం కోసమో ఒక పాటో డ్యాన్సో జోడించటం కద్దు.  అయితే దానికి వ్యతిరేకంగా జరుగుతోంది మహేష్ బాబు 1, నేనొక్కడినే సినిమా విషయంలో.

ఈ సినిమాలో దాదాపూ 20 నిమిషాల నిడివిని తగ్గించటానికి చిత్ర నిర్మాతలు పూనుకున్నారు.  అందుకు కారణం, ఈ సినిమా బాగా సాగదీసినట్లుగా, ప్రేక్షకులకు విసుగుకలిగించే విధంగా ఉందన్న టాక్ బయటకు రావటం.  చిత్ర నిర్మాతలు అనిల్ సుంకర, రామ్ అచంట, గోపి అచంట త్రయం సంక్రాంతికి ఎంతో ప్రతిష్టాత్మకంగా విడుదల చేస్తామని చెప్పుకుంటూ వచ్చిన సినిమా మీద నెగెటివ్ టాక్ వస్తుండటంతో దానికి మరమ్మతులు చేపట్టే దిశగా ఈ మార్పులు చెయ్యబోతున్నారు. 

అంతేకాదు, ఇది సాధారణంగా చూసే మసాలాను పూరించిన సినిమా కాదని, ఈ సినిమా నిర్మాణం పట్ల నిర్మాతలు, 14 రీల్స్ ఎంటర్ టైన్ మెంట్ పతాకం గర్వపడుతోందని కూడా వారు ప్రకటించారు.  నిజమే.  కొత్త రకం పదార్ధాన్ని తినేటప్పుడు పాతవాటితో దేనితోనూ పోల్చకూడదన్నది సత్యం.  ఇప్పుడు చూద్దాం జనవాక్యాన్ని అనుసరించి ఇప్పుడు తగ్గించిన ఈ సినిమాని ఈ రోజు నుంచి ప్రదర్శిస్తామంటున్నారు. 

అయితే నిర్మాతలు చేసిన మరో తప్పేమిటంటే, అంత ప్రచారం చెయ్యటం.  మహేష్ బాబు కి ఎలాగూ మంచి ఫాలోయింగ్ ఉన్నప్పుడు సినిమా గురించి అంత ఊదరగొట్టగూడదు.  ఎంత ఎక్కువ ప్రచారం జరిగితే అంత అంచనా పెరిగిపోతుంది.  అలాంటప్పుడు ఏమాత్రం లోపం ఉన్నా ప్రేక్షకులు నిరాశకు లోనవుతారు.

-శ్రీజ