Posted: 03/06/2012 08:59 PM IST

ప్రవాస భారతీయుడు ఇక్బాల్ శర్మపై చేయి చేసుకున్న ఘటనలో సైఫ్ అలీఖాన్ ఇటీవలే అరెస్ట్టై బెయిల్‌పై విడుదలైన సంగతి తెలిసిందే. అయితే ఈ వివాదం అప్పుడే ముగిసిపోయేలా కనిపించడం లేదు. ఈ వివాదానికి తెరదించాలని సైఫ్ కుటుంబం కోర్టు బయట రాజీ ప్రయత్నాల్ని మొదలుపెట్టింది. అయితే సైఫ్‌కు శిక్ష పడేంత వరకూ వదిలిపె లేదని భీష్మించుకు కూర్చుంది ఇక్బాల్ శర్మ భార్య, బాలీవుడ్ నటి తరీనా పటేల్. ‘నలుగురి ముందు తీవ్రమైన అవమానానికి గురయ్యాము. సైఫ్, అతని కుటుంబ సభ్యుల ప్రవర్తన అందరూ తలదించుకునేలా వుంది.

ఈ వ్యవహారంలో రాజీ కొచ్చే ప్రసక్తే లేదు. సైఫ్‌ను జైలుకు పంపించేంత వరకూ వదిలిపెట్టను’ అని తరీనా పటేల్ సీరియస్‌గా వార్నింగ్ ఇచ్చింది. చిన్నస్థాయి నటి కాబట్టి...మీరు పబ్లిసిటీ కోసమే రాద్థాంతం చేస్తున్నారన్న ప్రశ్నకు తరీనా స్పందిస్తూ ‘పబ్లిసిటీ కోసం ఇదంతా చేయాల్సిన అవసరం నాకు లేదు. సైఫ్ కుటుంబమే ఈ సంఘటన నుంచి సింపతీ పొందాలని చూస్తోంది’ అని చెప్పింది. దీంతో ఈ వివాదం ఏ మలుపులు తిరుగుతుందో అని బాలీవుడ్ వర్గాలు ఆసక్తిగా ఎదురుచూస్తున్నాయి.