Posted: 02/15/2012 04:11 PM IST

కష్టాలు, కన్నీళ్లు, వివాదాలు సంజయ్‌దత్ జీవితాన్ని ఎన్నోసార్లు చుట్టుముట్టాయి. యుక్త వయసులోనే మత్తుమందుల కేసు, పెళ్లి పెటాకులు కావడం వంటి సమస్యలు ఎదుర్కొన్నాడు. 1993 ముంబై పేలుళ్ల కేసులో అరెస్టు కావడంతో జైలు జీవితాన్ని కూడా అనుభవించాడు. జీవితం తొలిదశలోనే ఎన్నో ఎత్తుపల్లాలు చవిచూసిన ఈ ఖల్‌నాయక్ తన జీవితకథకు అక్షరరూపం ఇవ్వాలని కోరుకుంటున్నాడు. జీవితంలో ఎప్పుడైనా ఆత్మకథ రాయాలనిపించిందా అన్న ప్రశ్నకు బదులిస్తూ ‘రాయాలనే అనుకుంటున్నాను. ఓసారి ఆ ఆలోచన వచ్చింది. అయితే చాలా పెద్ద తతంగం. ఈ పనికి రచయితలు, ఎడిటర్లు, పబ్లిషర్ల వంటి చాలా మంది నిపుణులు కావాలి. ఇవన్నీ సాధ్యమైతే ఆత్మకథ రాస్తాను’ అని సంజయ్ అంటున్నాడు.

అందరూ సంజుబాబా అని పిల్చుకునే సంజయ్‌దత్ ప్రఖ్యాత నటులు సునీల్‌దత్, నర్గిస్‌ల కుమారుడు, 1986లో రిచాను పెళ్లాడినా బ్రెయిల్ ట్యూమర్ వల్ల ఆమె 1988లో ప్రాణాలు కోల్పోయింది. వీరిద్దరికి ఒక కూతురు జన్మించగా త్రిశాలా అనే పేరు పెట్టుకున్నారు. 1998లో రియా పిళ్లైతో పెళ్లయినా 2005లో ఇద్దరూ విడిపోయారు. దీని తరువాత మాన్యతాదత్‌ను పెళ్లాడగా ఇద్దరు సంతానం కలిగారు. ఒకప్పుడు మత్తుమందులకు బానిసైన సంజుబాబా.. తండ్రి ఒత్తిడి మేరకు అమెరికా వెళ్లి డీఎడిక్షన్ చికిత్స తీసుకున్నాడు. మత్తుమందుల కేసులో 1982లో అరెస్టై, ఐదు నెలలు జైల్లో ఉన్నాడు. అక్రమంగా ఆయుధాలు కలిగి ఉండడం, గ్యాంగ్‌స్టర్ అబూ సలెంతో సంబంధాలు ఉన్నాయనే ఆరోపణల కారణంగా టాడా చట్టం కింద మళ్లీ జైలుకు వెళ్లాడు. 1993 పేలుళ్ల కేసులో మాత్రం నిర్దోషిగా విడుదలయ్యాడు. ఇతడు 1981లో రాకీ ద్వారా హిందీ సినిమాల్లోకి వచ్చాడు. సాజన్, సడక్, మిషన్ కాశ్మీర్, వాస్తవ్, మున్నాభాయి ఎంబీబీఎస్ చిత్రాలు మంచి పేరుతెచ్చి పెట్టినా చాలా సినిమాలు ఫ్లాపులుగా మిగిలాయి. సంజుబాబా నటించిన పలు సినిమాలు ఈ ఏడాది విడుదలవుతున్నాయి.