బెయిల్ కోసం జగన్ సోనియాకు 1200 కోట్లు ?

Posted: 09/28/2013 11:03 AM IST

వైయస్సార్ కాంగ్రెస్ పార్టీ అధ్యక్షుడు అక్రమాస్తులు సంపాదించాడనే ఆరోపణతో సీబీఐ వారు ఆస్తుల పై విచారణ జరిపి, ఆయన్ను అరెస్టు చేసి దాదాపు 16 నెలల పాటు చంచల్ గూడ జైలులో ఉంచారు. ఇటీవలే జగన్ బెయిల్ పై విడుదల అయ్యి స్వేచ్చా వాయువులు పీల్చుకుంటున్నాడు. లక్షకోట్లు అక్రమంగా సంపాదించాడని ప్రతిపక్షాలు, కాంగ్రెస్ పార్టీ నాయకులు ఆరోపించారు. మరి అంత సంపాదించిన జగన్ కి ఇంత తొందరగా ఎలా బెయిల్ వచ్చింది ? సీబీఐ ఉన్నట్లుండి మొత్తం పది కంపెనీలలో ఎనమిది కంపెనీల్లో క్విడ్ ప్రో కో జరగలేదని తేల్చేసింది. అదే టైంలో సుప్రీం కోర్టు విధించిన బెయిల్ పిటీషన్ గడువు ముగిసి పోవడం జగన్ బెయిల్ కి అప్లై చేయడం సీబీఐ కోర్టు బెయిల్ ఇవ్వడం జరిగింది. ఈ తతంగం అంతా చూస్తుంటే జగన్ బెయిల్ కోసం కాంగ్రెస్ పార్టీ అధిష్టానంలో డీల్ కుదుర్చుకున్నారని అంటున్నారు తెలుగు దేశం పార్టీ నాయకులు.

ఈ డీల్ కోసం జగన్ కాంగ్రెస్ పార్టీ అధిష్టానానికి 1200 కోట్లు ఇచ్చారని అంటున్నారు తెదేపా నాయకులు గాలి ముద్దు క్రిష్ణమనాయుడు, సీఎం రమేష్. జగన్ బెయిల్ పై విడుదల అయిన రోజు చెన్నై, బెంగుళూరు, హైదరాబాద్, కడప జిల్లాల్లో దాదాపు 40 మంది వ్యక్తులు 1200 కోట్లు విత్ డ్రా చేశారని, ఆ మొత్తాన్ని జగన్ సోనియా గాంధీకి ఇచ్చారా ? లేక ఆరోజు రథయాత్రలా సాగిన ర్యాలీకి ఖర్చు పెట్టారా ? అన్నది లెక్క చెప్పాలని వారు డిమాండ్ చేశారు. జగన్ బెయిల్ కన్నా ముందు విజయమ్మ ఢిల్లీ వెళ్లి అక్కడ రాహుల్ గాంధీతో కలిసి ఓ హోటల్లో చర్చలు జరిపి ఈ డీల్ కుదుర్చుకున్నారని, అంతక ముందు కూడా బెంగుళూరులో కాంగ్రెస్ పార్టీ పెద్ద అయిన అహ్మద్ పటేల్ ని చాలా సార్లు కలిశారని ఇదంతా డీల్ కోసమే అని వారు అంటున్నారు.

గత కొన్ని రోజుల నుండి మిన్నకుండా ఉన్న వైకాపా ఎమ్మెల్యేలు కూడా జగన్ విడుదల అయిన వెంటనే రాజీనామాల ఆమోదానికి పట్టుబట్టడం, పలు పత్రికలు వారి డీల్ వ్యవహారాన్ని బయట పెట్టడంతో వెనక్కి తగ్గారని ఆరోపించారు. వీరు డీల్ కుదుర్చుకున్నట్లు కాంగ్రెస్ ఎంపీలు కూడా ఆరోపించారని, ఆ 1200 కోట్ల పై ఆర్ బీఐ, సీబీఐ దర్యాప్తు జరపాలని వారు కోరుతున్నారు. వీరు ఆరోపణల్లో ఎంత నిజం ఉందో కానీ, జగన్ బెయిల్ డీల్ విలువ 1200 కోట్లా జనం నోరెళ్ల బెడుతున్నారు.