దాసరి వేదన

Posted: 08/18/2013 12:27 PM IST

సినీ వేడుకలలో మాట్లాడుతున్నప్పుడు దర్శకుడు దాసరి నారాయణరావు ఏది మాట్లాడినా అందులో ఏదోవిధంగా రామ్ చరణ్ మీదనో మెగా ఫ్యామిలీ మీదనో నిగూఢంగా నిరసన వ్యక్తమౌతున్నట్టు కనిపిస్తుంది.  కాకపోతే తీరా అది బాహాటంగా వెలుగులోకి వచ్చేటప్పటికి అలాంటిదేమీ లేదంటారాయన. 

శ్రీకాంత్ నటించిన మొండోడు సినిమా ఆడియో ఫంక్షన్లో ముఖ్య అతిథిగా వచ్చిన దాసరి, చిన్న సినిమాల గురించి తను పడుతున్న వేదనను వెల్లడిచేస్తూ, ఒకప్పుడు సినిమా నిర్మాణాన్ని చేపట్టినప్పుడే విడుదల తేదీని నిర్ణయించేవారని, ఇప్పుడేమో పెద్ద సినిమాలు మాత్రమే అలా విడుదల తేదీలను ప్రకటించగలుగుతున్నాయని అన్నారు.  

అంతేకాదు, ఆ పెద్ద సినిమాలు కూడా ఇష్టానుసారం విడుదల తేదీలను మారుస్తూ పోతుంటే చిన్న సినిమాలు నిష్కారణంగా చితికిపోతున్నాయంటూ ఆ సినిమాల సంకటస్థితి పట్ల తన వేదనను వ్యక్తపరచిన దాసరి, ఇదంతా రామ్ చరణ్ సినిమాలు ఎవడు, తుఫాన్, పవన్ కళ్యాణ్ సినిమా అత్తారింటికి దారేది విడుదల తేదీలు మారిపోవటం వలన అలా జరుగుతున్నదన్నదని చెప్పకనే చెప్పేసారు.

-శ్రీజ