Posted: 11/21/2012 05:10 PM IST

రాష్ట్రంలో ప్రస్తుతం కిరణ్, బొత్సలను కామెంట్ చేస్తూ అధిష్టానానికి ఫిర్యాదు చేసిన కిషోర్ చంద్రదేవ్ లేఖ కలకలం స్రుష్టిస్తున్న విషయం తెలిసిందే. ఈలేఖ విషయంలో కొత్త ట్విస్ట్ బయటకి వచ్చింది. ఎంతో సీక్రెట్ గా అధిష్టానానికి చేరవేసిన ఈలేఖ ఎలా లీకయ్యిందని ఆరా తీస్తే కొత్త కోణం వెలుగు చూసిందట. ఈ లేఖ లీకు వెనుక కాంగ్రెస్ యువనేత రాహుల్ గాంధీ టీమ్ ఉన్నదనే అనుమానాలు వ్యక్తమవుతున్నాయి. రాహుల్ వర్గానికి చెందిన కొందరు కిరణ్, బొత్సల పై కన్నేసి, వారి పదవికి ఎసరు పెట్టేపనిలో భాగంగానే ఈ లేఖను లీకు చేసినట్లు వార్తలు. ఎప్పుడో రాసిన ఈ లేఖను ఇప్పుడు బయట పెట్టాల్సిన అవసరం ఏముందని, వీరిద్దరి తీరు, వ్యవహార శైలి నచ్చకనే రాహుల్ టీం బయటపెట్టిందనే వార్తలు వినిపిస్తున్నాయి. కాంగ్రెస్ పార్టీకి జనంలో మంచి మార్కులను రాబట్టడంలో అటు బొత్స, ఇటు ముఖ్యమంత్రి కిరణ్ కుమార్ రెడ్డి పూర్తిగా విఫలమవుతున్నారన్న భావన అధిష్టానంలో వ్యక్తమయినట్లు సమాచారం. పరిస్థితి ఇలాగే 2014 దాకా సాగితే పార్టీ పరిస్థితి మరింత ఘోరంగా తయారయ్యే ప్రమాదం ఉందన్న సంకేతాలు అందినట్లు తెలుస్తోంది. పైగా కిరణ్ కి , బొత్సకు మధ్య విభేదాలు కూడా ఉండటంతో, వీరి కుమ్ములాటకే టైం సరిపోతుంది. ఇక రాష్ట్రాన్ని ఎక్కడ పాలిస్తారు అనే విషయాన్ని పలువురు సీనియర్ కాంగేయులు అధిష్టానం చెవిలో చెప్పినట్లు తెలుస్తోంది. వీటన్నిటి నేపధ్యంలో కిషోర్ చంద్రదేవ్ లేఖను లీక్ చేయడం ద్వారా ఇద్దరికీ పొమ్మనకుండా పొగ పెట్టాలని నిర్ణయించుకున్నట్లు చెపుతున్నారు . మొత్తానికి యువరాజు టీం లీక్ చేయడం చూస్తుంటే.... రాహుల్ ఓ ప్లాన్ ప్రకారమే చేయిస్తున్నారని అంటున్నారు.