Posted: 11/16/2012 01:20 PM IST

ప్రస్తుత బీజేపీ పార్టీ జాతీయ అధ్యక్షుడు నితిన్ గడ్కరీ పై అవినీతి ఆరోపణలు రావడంతో ఆయనను అధ్యక్ష పదవి నుండి తప్పించాలనే డిమాండ్ రోజు రోజుకు పెరుగుతున్న తరుణంలో కొత్త అధ్యక్షుడిగా ఎవర్ని నియమించాలనే దాని పై తర్జన భర్జనలు పడుతుంది ఆర్ఎస్ఎస్. అయితే రానున్న ఎన్నికలను ద్రుష్టిలో పెట్టుకొని, ఆ ఎన్నికలకు పార్టీని సన్నద్ధం చేసే నాయకుడ్ని నియమించాలనే ఆలోచనలో ఉంది. ఈ నేపథ్యంలోనే గతంలో అధ్యక్షుడిగా పని చేసిన ముప్పవరపు వెంకయ్యనాయుడుకి మళ్లీ పార్టీ పగ్గాలను అప్పగించేందుకు పావులు కదుపుతున్నట్లు సమాచారం. అనేక ఎన్నికల నిర్వహణలో ఆరితేరిన సీనియర్ నేత బీజేపీ, ఆర్ఎస్ఎస్ వర్గాలు. గతంలో బీజేపీ అధ్యక్షుడుగా ఉన్న వెంకయ్య పార్టీకి, ప్రభుత్వానికి, సంఘ్ పరివార్‌కూ మధ్య సమన్వయాన్ని సమర్థంగా నిర్వహించారని, పార్టీ కార్యక్రమాలను ఆరోగ్యకరంగా నిర్వహించారని, వివిధ రాష్ట్రాల్లో ఎన్నికల నిర్వహణను చక్కగా చేపట్టారని ఆర్ఎస్ఎస్ వర్గాలు భావిస్తున్నాయి.  ఈ నేపథ్యంలో డిసెంబర్ మూడో వారంలో జరిగే బీజేపీ జాతీయ మండలి సమావేశంలో గడ్కరీ తనంతట తాను తప్పుకునేందుకు అవకాశం కల్పిస్తారని విశ్వసనీయ వర్గాలు తెలిపాయి.

ఈలోపులోనే, భావి నాయకత్వంపై పార్టీ నేతలు, సంఘ్ పెద్దలు ఒక నిర్ణయానికి రావచ్చునని, ఇప్పటికే ఈ దిశగా అంతర్గత చర్చలు ప్రారంభమయ్యాయని తెలిసింది. విశ్వసనీయ వర్గాల సమాచారం ప్రకారం సీనియర్ నేతలు వెంకయ్యనాయుడు, రాజ్‌నాథ్ సింగ్, శాంతకుమార్ పేర్లు పరిగణనలోకి వచ్చినా, సంస్థాపరంగా నిర్వహణ సామర్థ్యం కలిగిన వెంకయ్య వంటి నేత ప్రస్తుతం అవసరమని బీజేపీ, సంఘ్ పెద్దలు భావిస్తున్నట్లు తెలిసింది. గత నాలుగు దశాబ్దాలుగా సంఘ్‌తో సంబంధాలున్న వెంకయ్య ఇటు పార్టీకి, అటు సంఘ్‌కు విధేయంగా ఉంటారని, రెండింటికీ వ్యతిరేకంగా మాట్లాడిన సందర్భాలు ఎప్పుడూ లేవని పార్టీ నేతలు గుర్తు చేస్తున్నారు. పార్టీ కోరినప్పుడు కేంద్రంలో కేబినెట్ పదవి సైతం వదులుకుని 2002-04 మధ్య పార్టీ అ«ధ్యక్షుడిగా బాధ్యతలు నిర్వహించిన సంగతి తెలిసిందే. వెంకయ్య అధ్యక్షుడుగా ఉన్నంతకాలం ఎలాంటి వివాదాలు తలెత్తలేదని పార్టీ నేతలు చెబుతున్నారు. మంచి అనుభవం, సామార్థ్యం ఉన్న వెంకయ్యను పార్టీ అధ్యక్షుడిగా చేస్తే అన్ని విధాల లాభమే అంటున్నారు రాజకీయ విశ్లేషకులు. మరి వెంకయ్యను మళ్లీ అధ్యక్ష పదవి వరిస్తుందో లేదో చూడాలి.