Posted: 09/06/2012 06:35 PM IST

ఢిల్లీలో తెలంగాణకు అనుకూలంగాను, వ్యతిరేకంగాను మళ్లీ లాబీయింగ్ జోరుగా సాగుతోంది. తెలంగాణ కాంగ్రెస్ ఎమ్.పిలు ఆయా ప్రముఖులతోపాటు ఢిల్లీ పర్యటనకు వచ్చిన టిడిపి అదినేత చంద్రబాబు నాయుడును కూడా కలిసి తెలంగాణపై కేంద్రానికి లేఖ ఇవ్వాలని కోరారు. సీమాంధ్ర ఎమ్.పిలు ప్రధాని మన్మోహన్ సింగ్ ను కలిసి రాష్ట్రం సమైక్యంగా ఉండకపోతే రెండు వైపులా నష్టం జరుగుతుందని వివరించారు. కేంద్రం ఈ మేరకు నిర్ణయం తీసుకుని రాష్ట్రం సమైక్యంగానే ఉంటుందని ప్రకటన చేయాలని కోరారు. అయితే వస్తున్న కధనాల ప్రకారం ప్రధాని తనకు అన్ని సమస్యలు తెలుసునని, సోనియాగాంధీని కలిసి కూడా ఈ విషయాలను వివరించండని, సత్వరమే నిర్ణయం తీసుకోవలసిందిగా కోరారని చెబుతున్నారు.ఈ వ్యాఖ్యల బట్టి చూస్తుంటే ప్రధాని తెలంగాణ రాష్ట్ర ఏర్పాటుకు అంత అనుకూలంగా లేరేమోనన్నసందేహం కలుగుతుంది. అయితే సోనియాగాంధీ మాత్రం కొంత అనుకూలంగా ఉన్నారేమోనన్న భావన కూడా కలుగుతుంది. ఏది ఏమైనా ఈ నెలాఖరులోగా తేలిపోతుందని కెసిఆర్ చెబుతున్నారు. అయితే ఈ నెలాఖరులోగా నిర్ణయం తీసుకోకపోతే మీ ఇష్టం అని తెలంగాణ జెఎసి హెచ్చరించి వచ్చింది.