Posted: 08/26/2012 03:07 PM IST

       రేపటినుండి ఇంజనీరింగ్ కౌన్సిలింగ్  ప్రక్రియ ప్రారంభమౌతున్న నేపథ్యంలో  ఫీజులపై ప్రభుత్వం స్పష్టత ఇచ్చింది. కొన్ని నెలలుగా రాష్ట్రంలో కొనసాగుతున్న ఫీజుల వివాదానికి తెరదించుతూ సర్కార్  ఉత్తర్వులు జారీచేసింది. రాష్ట్రంలో మొత్తం 689 ప్రైవేట్  ఇంజనీరింగ్  కాలేజీలు ఉండగా అందులో 645 కాలేజీలకు ఫీజులు ఖరారు చేస్తూ ప్రభుత్వం జీవో జారీచేసింది. ఆరోవేతనసంఘం లెక్కలప్రకారం A.F.R.C కి అఫిడవిట్లు సమర్పించిన 67 కాలేజీల్లో వేరువేరుగా ఫీజులను ఖరారు చేసింది.
 
     అందులో హైదరాబాద్ లోని సిబిఐటీ లక్ష ఐదువేల రూపాయల ఫీజుతో టాప్ లో ఉండగా దాని తరువాత వాసవి ఇంజనీరింగ్  కాలేజీలో 98వేల 700 రూపాయలు, వరంగల్ లోని కాకతీయ ఇనిస్టిట్యూట్  ఆఫ్  టెక్నాలజీలో 95 వేలరూపాయలు ఫీజులు ఉండబోతున్నాయి. అంతేగాక ప్రభుత్వం నిర్ణయించిన ఫీజును ఒప్పుకుంటూ A.F.R.C కి అంగీకారపత్రాలు సమర్పించిన 578 కాలేజీలకు 35వేల రూపాయలను ఫీజుగా ప్రభుత్వం ఖరారుచేసింది. అయితే రాష్ట్రంలోని మొత్తం 689 ఇంజనీరింగ్  కాలేజీల్లో 44 కాలేజీలు మాత్రం A.F.R.C కి ఎలాంటి అఫిడవిట్లు సమర్పించలేదు. దీంతో ఆ 44 కాలేజీల ఫీజుల వివరాలను ప్రభుత్వం  ప్రకటించలేదు. అంతేగాక హైకోర్ట్ తీర్పును ఉటంకిస్తూ ఆ 44 కాలేజీల ఫీజులకు సంబంధించి ఎఎఫ్ ఆర్సీ మరొకసారి పునఃసమీక్షించి ఖరారు చేయాలని ప్రభుత్వం ఉత్తర్వుల్లో పేర్కొంది.
 
    ఇంజనీరింగ్ తో పాటు బి.ఫార్మసీ, ఫార్మా డి, బి.ఆర్క్ కోర్సులకు సైతం ప్రభుత్వం ఫీజులను ఖరారు చేసింది. బిఫార్మసీలో ఆరోవేతనసంఘం లెక్కలప్రకారం ఎఎఫ్ ఆర్సీకి అఫిడవిట్లు సమర్పించిన 5 ఫార్మసీ కాలేజీల్లో వేరువేరుగా ఫీజులు ఉండనున్నాయి. అయితే బిఫార్మసీ కోర్సుకు ఫీజు 31వేల రూపాయలకు అంగీకరిస్తూ ఎఎఫ్ఆర్సీకి అండర్ టేకింగ్  ఇచ్చిన 74 కాలేజీల్లో 31వేలు, 35వేల రూపాయలకు అంగీకరిస్తూ ఎఎఫ్ఆర్సీకి అండర్ టేకింగ్  ఇచ్చిన 162 కాలేజీల్లో 35వేల రూపాయల ఫీజులను సర్కార్  ఖరారు చేసింది. వీటికి తోడు ఫార్మా డి కోర్సుకు 19 కాలేజీల్లో 68వేలు, బిఆర్క్ కోర్సుకు రెండు కాలేజీల్లో 35వేల చొప్పున ఫీజులు ఉండనున్నాయి. ఫీజుల వివాదం సద్దుమణిగిందనుకుంటే మరోవైపు ఫీజురీయింబర్స్మెంట్ పథకం అమలుపై నీలినీడలుకమ్ముకున్నాయి.
 
     గత ఏడాది వరకు ఫీజులు మొత్తం ప్రభుత్వమే చెల్లించింది. అయితే ఈయేడాది నుంచి ఇంజనీరింగ్  కాలేజీల్లో క్యాటగిరీలు ఏర్పడి 74 కాలేజీల్లో ఫీజలు వేర్వేరుగా ఉన్నాయి. దీంతో సర్కారు మాత్రం ఇప్పటికప్పుడు ఫీజురీయింబర్స్మెంట్  పథకంలో  35 వేల వరకు మాత్రమే చెల్లించడానికి సిద్ధంగా ఉంది. ఫీజులు అధికంగా ఉన్న 74 కాలేజీల్లో చేరే విద్యార్థులు 35వేలకు పైన ఎంత ఫీజు ఉన్నా ఆ మిగిలిన మొత్తాన్ని వారే చెల్లించాల్సిన పరిస్థితి ఏర్పడింది. దీనిపై ప్రభుత్వం ఒక స్పష్టమైన ప్రకటన చేయాల్సిఉంది.. 100 శాతం ఫీజు రియంబర్స్ మెంట్  చెల్లించాలా? లేక సీలింగ్  పెట్టాలా అన్న విషయంపై కేబ్ నెట్  సబ్  కమిటి రేపు మరోసారి భేటీ అయి నిర్ణయించనుంది.

...avnk