Posted: 08/25/2012 04:36 PM IST

వైయస్సార్ కాంగ్రెస్ పార్టీ అధ్యక్షుడు, కడప పార్లమెంటు సభ్యుడు జగన్ మోహన్ రెడ్డి బినామీల పేరుతో, కుంభకోణాలతో అక్రమంగా ఆస్తులు సంపాదించి చంచల్ గూడ జైలుకు వెళ్ళిన విషయం తెలిసిందే. జగన్ బయట ఉన్నప్పుడు పెద్ద ఖిలాడీ అని పలువురు రాజకీయ నాయకులు ఆరోపించారు. ఇప్పుడు వారి మాటలను నిజం చేసే విధంగా జగన్ చంచల్ గూడ జైల్లో ఉండి కూడా ఖిలాడీ పనులు చేస్తున్నాడట. అక్కడ బినామీ పేర్లతో రాజకీయాలు చేస్తున్నాడట. ఆయన చేసే బినామీ రాజకీయాల పేరు ‘‘బినామీ ములాఖత్ లు ’’. ఇదేంటి కొత్త రకం రాజకీయం అనుకుంటున్నారా ? ఏం లేదు.. జగన్ ముందు పెద్ద పెద్ద వారే నోరు తెరవక ఇప్పుడు జైల్లోకి వచ్చారు.. వస్తున్నారు... అలాంటిది చంచల్ గూడ జైలు అధికారలు ఓ లెక్కా...  వైఎస్ జగన్‌కోసం చంచల్‌గూడ జైలు అధికారులు కల్పించిన ప్రత్యేక సౌకర్యమిది. జైలులో జగన్‌కు ములాఖత్‌లు విచ్చలవిడిగా ఇచ్చేందుకు అధికారులు కొత్తపుంతలు తొక్కుతున్నారట. జైలు నుంచే జగన్ తన రాజకీయ కార్యకలాపాలు నడుపుకొనేందుకు సంపూర్ణంగా సహకరిస్తున్నారు. ఇందుకు పకడ్బందీ వ్యూహాన్నే అనుసరిస్తున్నట్లు సమాచారం.

జగన్‌ను కలిసేందుకు వస్తున్న నాయకుల వివరాలను రిజిస్టర్‌లో నమోదు చేయకుండానే ములాఖత్‌లకు పంపిస్తున్నారు. కుటుంబ సభ్యుల వివరాలను మాత్రం అధికారికంగా రిజిస్టర్‌లో పేర్కొంటూ... మిగిలిన వారిని 'రహస్యం'గా పంపించేస్తున్నారు. మరికొందరినేమో... జైలులో ఉన్న ఇతర ఖైదీలు, వీవీఐపీ ఖైదీలను కలిసేందుకు వస్తున్న వారిగా చూపిస్తూ, ఆ ముసుగులో జగన్‌తో ములాఖత్‌లు ఇస్తున్నట్లు తెలిసింది. జగన్ ములాఖత్‌ల కోసం భారీగా డిమాండ్ ఉండటంతో... వేర్వేరు ఖైదీల పేరిట వాటిని కేటాయిస్తున్నట్లు తెలిసింది. ఇలా వెళ్లిన వారంతా జగన్‌తో రాజకీయ అంశాలు చర్చించి, ఆయన సలహాలు తీసుకుని చక్కగా బయటికి వస్తున్నారట. జగన్‌తో గంటల తరబడి తాజా రాష్ట్ర రాజకీయాలపై విశ్లేషిస్తున్నట్లు విమర్శలు ఉన్నాయి. వీటన్నింటి ద్వారా జగన్ జైలు నుంచే తన పార్టీని పటిష్ఠం చేసే ప్రణాళికలను సిద్ధం చేసుకుంటున్నారట. ఎన్నో బినామీల పేరుతో వేల కోట్ల ఆస్తులను కూడబెట్టిన జగన్ జైల్లో ‘బినామీల ములాఖత్ ’ కుంభకోణాలు చేయడం పెద్ద లెక్కకాదంటున్నారు.