Posted: 07/07/2012 07:16 PM IST

తెలుగుదేశం పార్టీ అధ్యక్షుడు నారా చంద్రబాబు నాయుడు బీసి రాజకీయ నాయకులకు వరం ఇచ్చేశారు. వచ్చే సాధారణ ఎన్నికల్లో తమ పార్టీ బీసీ నేతలకు వంద సీట్లు కేటాయిస్తుందని ఆయన చెప్పారు. పార్టీకి బిసీలు దూరమవుతున్నారనే ఉద్దేశంతో ఆయన ఈ వరాన్ని ప్రదానం చేశారు.తెలుగుదేశం పార్టీ కొత్త వ్యూహంలోకి వెళుతోంది. వెనుకబడిన తరగతులవారికి (బిసి)అత్యంత ప్రాధాన్యత ఇవ్వడానికి వ్యూహ రచన చేసుకుంటోంది. అందులో భాగంగా బిసి నాయకులతో చంద్రబాబు నాయుడు సమావేశమై పలు అంశాలపై చర్చలు జరిపారు. బిసిలకు వచ్చే ఎన్నికలలో వంద సీట్లు కేటాయించాలని నిర్ణయించుకున్నట్లు చంద్రబాబు ప్రకటించారు. అలాగే బిసిలకు పదివేల కోట్ల బడ్జెట్ ను ప్రత్యేకంగా కేటాయించే విధంగా చర్యలు తీసుకుంటామని ఆయన తెలిపారు.

అలాగే బిసిలకు చట్ట సభలలో ముప్పై మూడు శాతం సీట్లు కేటాయించడానికి కేంద్రంపై ఒత్తిడి పెంచడానికి కృషి చేస్తామని చంద్రబాబు తెలిపారు.అలాగే కేంద్రంలో బిసిలకు ప్రత్యేక మంత్రి ఉండాలని కూడా సూచించారు. ఏడాది ముందే అభ్యర్దులను ప్రకటించే విషయంపై కూడా దృష్టి పెట్టారు. గత ఉప ఎన్నికలలో బిసిలు కూడా తమకు అంత ఆదరణ చూపలేదని ఆ పార్టీ నేత దేవేందర్ గౌడ్ చేసిన వ్యాఖ్యల నేపధ్యంలో బిసిలను తిరిగి తమ పార్టీవైపు ఆకర్షించేందుకు అన్ని రకాల చర్యలు చేపట్టడానికి టిడిపి సన్నద్దమవుతోందని భావించాలి.అయితే కేవలం సీట్లు ఇచ్చినంతమాత్రాన సరిపోతుందా అన్న ప్రశ్న కూడా ఉంది. గత సాధారణ ఎన్నికలలో ప్రజారాజ్యం తరపున చిరంజీవి నూటనాటుగు మంది బిసిలకు సీట్లు ఇచ్చినా విజయం సాధించలేకపోయారు. అభ్యర్ధుల ఎంపిక కూడా ముఖ్యమైనదే. అయితే బడ్జెట్ తదితర అంశాలు, బిసిల పట్ల పార్టీకి శ్రద్ద ఉందన్న నమ్మకం వల్ల ఎక్కువ ప్రయోజనం ఉంటుంది.