Posted: 05/26/2012 06:39 PM IST

నాకు తెలిసి ఇండియాలో ప్రభుదేవా లాంటి డాన్సర్ ప్రస్తుతం అయితే లేరు. ఒక్క డాన్స్‌లోనే కాదు... నటనలో కూడా ఆయన నాకు ఎన్నో మెళకువలు నేర్పుతున్నారు. ‘దబాంగ్’కి భిన్నంగా ఇందులో కనిపిస్తా. ఇందులో కొన్ని కొన్ని సీన్స్ చూస్తుంటే... నాలో ఇంత ఫైర్ ఉందా అనిపిస్తోంది  ‘దబాంగ్’ భామ సోనాక్షిసిన్హా ... ప్రభుదేవా వద్ద పాఠాలు నేర్చుకునే పనిలో ప్రస్తుతం బిజీగా ఉన్నారు. సోనాక్షికి ప్రభుదేవా పాఠాలు అనగానే... మరోలా ఊహించకండి. అవి కేవలం డాన్స్‌కి సంబంధించిన పాఠాలు మాత్రమే. హృతిక్‌రోషన్‌కి తొలినాళ్లలో డాన్స్ ప్రాక్టీస్ చేయించింది ప్రభుదేవానే. ప్రస్తుతం హృతిక్ డాన్సింగ్‌స్టార్‌గా పేరు గడించారంటే... అందులో ప్రభుదేవా పాత్ర లేకపోలేదు. హృతిక్‌లాగానే... తాను కూడా ప్రభుదేవా వద్ద నాట్యాన్ని అభ్యసించి డాన్సింగ్‌స్టార్ అనిపించుకోవాలని సోనాక్షి ఆశపడ్డారు.

ఈమెలో ఈ ఆకాంక్ష రగలడానికి కారణం ‘రౌడీ రాథోడ్’ సినిమా. అక్షయ్‌కుమార్, సోనాక్షి జంటగా నటించిన ఈ చిత్రానికి ప్రభుదేవా దర్శకత్వం వహించిన విషయం తెలిసిందే. ఆ సినిమాకు కొరియోగ్రఫీ కూడా ప్రభుదేవానే అందించారు. పాటల్లో ప్రభు ఇస్తున్న డాన్స్ మూమెంట్స్ చూసి సోనాక్షి విస్మయానికి లోనయ్యారట. ఆ క్షణంలోనే సోనాక్షికి ఆ కోరిక కలిగింది. తన మనసులోని కోరికను ఇటీవల నేరుగా ప్రభుదేవా వద్ద ఈ ముద్దుగుమ్మ వ్యక్తం చేశారట. అందుకు ఆయన కూడా అంగీకారం తెలుపడంతో గత కొన్ని రోజులుగా ప్రభుదేవా వద్ద సోనాక్షి డాన్స్ ప్రాక్టీస్ చూస్తూ బిజీగా ఉన్నారు.