Posted: 04/27/2012 06:19 PM IST

రీల్ లైఫ్ లో హీరోగా నటించి నటించి అలవాటు పడి రియల్ లైఫ్ లో కూడా హీరోయిజాన్ని ప్రదర్శిస్తుంటారు కొంత మంది హీరోలు. కానీ మేకప్ తీసివేసిన తరువాత సాధారణ మనిషిని అన్న విషయాన్ని కూడా మరచిపోయి ప్రవర్తిస్తుంటారు. ఎవరో నూటికో..కోటికో ఒక్క హీరో తన మానవత్వాన్ని ప్రదర్శిస్తున్నారు. ఆ కోవలోకే వస్తాడు బాలీవుడ్ అమీర్ ఖాన్ కూడా. సమాజం కోసం ఉపయోగ పడే యాడ్స్ సినిమాలు చేస్తూ ఉండే అమీర్ ఖాన్ ఓ ఆటో డ్రైవర్ కొడుకు పెళ్ళికి వెళ్ళి అందరినీ ఆశ్చర్యపరిచాడు.

విషయం ఏంటేంటే...గతంలో వచ్చిన ‘త్రీ ఇడియట్స్’ సినిమా ఎంత ఘనవిజయాన్ని సాధించిందో మనందరికి తెలిసిన విషయమే. అయితే ఆ సినిమా షూటింగ్ అప్పుడు అమీర్ ఖాన్ కి ఓ ఆటో డ్రైవర్ రామ్ లఖన్ తో దోస్తీ కుదిరింది. అప్పుడు ఆ ఆటో డ్రైవర్ అమీర్ ఖాన్ ని తన కుమారుడి పెండ్లికి రావాలని విన్నవించాడు.

అమీర్ ఖాన్ ‘గజిని’ కదా... ఆయనేం గుర్తుపెట్టుకుంటాడులే అని ఆటో డ్రైవర్ అనుకున్నాడేమో కానీ... ఈ గజనీ మాత్రం ఆ విషయాన్ని ఖచ్చితంగా గుర్తుపెట్టుకొని మరీ ఈ పెండ్లికి వచ్చి అందరినీ ఆశ్చర్యంలో ముంచెత్తాడు. తన స్నేహితుడిని ఆప్యాయంగా ఆలింగనం చేసుకున్నాడు. దీంతో ఆ ఆటోడ్రైవర్ ఆనందానికి అవధులు లేకుండా పోయాయి. కానీ ఆ పెండ్లికి వచ్చిన వారు మాత్రం అమీర్ ఖాన్ వ్యక్తిత్వాన్ని మెచ్చుకున్నారు.