Posted: 04/07/2012 05:39 PM IST

అడవిలో ప్రతి ఆకుకు.. ప్రతి కొమ్మకు.... అక్కడ నివసించే ప్రతి జంతువుకు తెలుసు వీరప్పన్. అడవిలో చెట్టునడిగి.. పుట్టనడిగి ..వీరప్పన్ పేరు చెబుతుంది. అతనికి అడవి అంత దగ్గర సంబంధం ఉంది. వీరప్పన్ పేరు వినబడితే చాలు .. గంధం చెట్టు.. నేలపై నిద్రపోతుంది. ప్రతి గంధం చెట్టుకు వీరప్పన్ శత్రువు. అడవిలో వీరప్పన్ అడుగు చప్పుడు వినబడగానే.. గజ ఏనుగులు సైతం.. వణికిపోవాల్సిందే. ఒక అడవినే కాకుండా .. అటు శ్రీలంకను.. ఇటు తమిళనాడు, .. కర్ణాటక ప్రభుత్వలకు మచ్చు చెమట్లు పట్టించిన ఘనత వీరప్పన్ కే దక్కింది. అతన పేరుతో చాలా బడానాయకులు బాగుపడ్డారని .. అతని భార్య ముత్తు లక్ష్మీ చెబుతుంది. అయితే వీరప్పన్ మరణం తరువాత ఇలాంటి నిజాలు బయటి వచ్చిన లాభం లేదని.. ఆయన సన్నిహితులు అంటున్నారు.

వీరప్పన్ భార్యనన్న ఒకే ఒక్క కారణంతో తనను బలిపశువును చేశారని, తన భర్తను సమాజ ఘాతకుడిగా చిత్రీకరించారని దీని వెనుక తమిళనాడు, కర్ణాటక ప్రభుత్వాల కుట్ర ఉందని పేర్కొన్నారు.వీరప్పన్ పట్టివేత ఆపరేషన్ సందర్భంగా అప్పటి స్పెషల్ టాస్క్‌ఫోర్స్ పోలీసులు గిరిజన మహిళలపై అత్యాచారాలకు పాల్పడి దారుణంగా వేధించారని వీరప్పన్ భార్య ముత్తులక్ష్మి ఆరోపించారు. పోలీస్ ఉన్నతాధికారి శంకరబిదరిని పెద్ద రేపిస్ట్ అంటూ అభివర్ణించారు. విచారణ పేరిట గిరిజన మహిళలను పోలీస్ స్టేషన్‌లకు తీసుకెళ్ళి వివస్త్రలుగా మార్చి కరెంట్ షాక్ ఇచ్చే వారని ఆమె ఆరోపించారు. జాతీయ మానవ హక్కుల కమిషన్ నివేదిక నూటికి నూరుపాళ్లు నిజమన్నారు.

శంకర్‌బిదరి ఎస్టీఎఫ్ చైర్మన్‌గా ఉన్న సమయంలో తనను అక్రమంగా అరెస్టు చేయించారని ఆపై బలవంతంగా తాళి తీసేయాలంటూ బెదరించారని ముత్తులక్ష్మి ఆరోపించారు. సమగ్ర దర్యాప్తు జరిపితే తమిళనాడు, కర్ణాటక పోలీసుల అకృత్యాలు బయటపడతాయన్నారు. వీరప్పన్ చరిత్రను పోలీసులు వక్రీకరించి ఒకవైపే చూపించారని.. రెండోవైపు నిజం ఏమిటన్నది గిరిజనులు, నిరుపేదలకు మాత్రమే తెలుసన్నారు.

ముత్తులక్ష్మి ఆరోపణలను ఖండించిన బిదరి ముత్తులక్ష్మి తనపై చేసిన ఆరోపణల వెనుక పెద్ద కుట్ర దాగి ఉందని శంకరబిదరి ఆరోపించారు. ముత్తులక్ష్మి ఆరోపణల్లో ఏమాత్రం నిజం లేదన్నారు. అసలు ముత్తులక్ష్మిని తాము అరెస్టు చేయలేదని తాళి తెంపాల్సిందిగా సూచించనేలేదని ఇవన్నీ కట్టుకథలని ఆయన కొట్టిపారేశారు. జాతీయ మానవ హక్కుల సంఘం అప్పట్లోనే తనకు క్లీన్‌చిట్ ఇచ్చిన సంగతిని బిదరి గుర్తు చేశారు.