Posted: 03/08/2012 03:33 PM IST

చెత్త చిత్రంలో ఉత్తమ నటి విద్యా ఏమిటి అనుకుంటున్నారా? ఏమీ లేదండి .. అప్పట్లో విద్యాబాలన్ నటించిన ది డర్టీ పిక్చర్’ చిత్రం పై అనేక విమర్శలు వచ్చాయి. ఆ విమర్శల నుండి .. బయటపడిన విద్యాబాలన్ కు ది డర్టీ పిక్చర్’ చిత్రం అనుకున్నంత చెత్త లేదని .. ఆ విమర్శకులే.. విద్యాబాలన్ ను పొగిడిన విషయం తెలిసిందే. ఇప్పుడు అలాంటి చెత్త చిత్రంలో నటించినందుకు విద్యాబాలన్ కు ఉత్తమ నటి అవార్డు వరించింది. అంతేకాకుండా .. జాతీయ అవార్డు కూడా రావటం విశేషం. సినిమా విడుదలైన దగ్గర్నుంచి అందుకు పూర్తి విరుద్ధమైన అభినందనలే అభినందనలు. ముఖ్యంగా ఆ చిత్రంలో ‘కథానాయకి’ పాత్ర పోషించిన విద్యాబాలన్‌కు దేశం నలుమూలల నుండి కితాబుల వర్షం కురిసింది. ‘ఫిలింఫేర్’ ఉత్తమనటి అవార్డు పొందడమే కాకుండా ప్రకటించిన జాతీయ అవార్డుల్లో కూడా తనే ‘అత్యుత్తమనటి’గా విజయం కేతనం ఎగరేశారు.

‘మహిళాదినోత్సవం’ సంబరాల్లో మునిగితేలవలసిన విద్యాబాలన్‌కు ఆ కిరీటం అందటం ఆనంద డోలికల్లో ఊగినట్లుయింది.ఈ పరిణామంతో భారతీయ చిత్రపటంలో విద్యాబాలన్ పేరు మారుమోగిపోయింది. ఒక ‘శృంగారతార’ నిజజీవితంలోని పాత్రను ‘సాహసం’గా తీసుకుని... అది కూడా అప్పటివరకు ‘హోమ్లీ ఇమేజ్’ను ఏర్పరచుకున్న పరిణతి కలిగిన నటిగా ఉన్న విద్యాబాలన్ చేజిక్కిన ఈ తాజా ప్రశంసను ప్రతి స్త్రీయే కాకుండా, సినిమాలను ప్రేమించే ప్రతి ఒక్కరూ కూడా నిండు మనసుతో అభినందిస్తున్నారు.‘ది డర్టీ పిక్చర్’ చిత్రాన్ని ఒక స్త్రీ (ఏక్తాకపూర్)యే నిర్మించడం ఈ సందర్భంగా ప్రత్యేకంగా చెప్పుకోవలసిన అంశం కూడా.జాతీయ అవార్డు తన దరి చేరిన శుభసందర్భంలో విద్యాబాలన్ మనసులోని భావన ఈ విధంగా ఉంది.

‘‘నమ్మలేకపోతున్నా. కానీ నమ్మడానికి ప్రయత్నిస్తున్నా. నా కల నిజమైంది. ఏం చెప్పాలో తెలియడంలేదు. ఈ చిత్రాన్ని నాకిచ్చిన దర్శకుడు మిలన్ లూద్రియాకి మనస్ఫూర్తిగా ధన్యవాదాలు తెలియజేసుకుంటున్నాను. మన దేశంలోనే అత్యంత ప్రతిష్టాత్మకమైన అవార్డ్ ఇది. ఈ అవార్డ్ నాకెంతో ప్రత్యేకం. ఆ మాటకొస్తే.. నేను పొందే ప్రతి అవార్డ్ నాకు ప్రత్యేకమే.

‘డర్టీ పిక్చర్’లో నేను చేసిన పాత్రలో శారీరకంగా ఒదిగిపోవడమే కాదు... మానసింకగా ఎంతో ఫీల్ అయ్యి చేయాల్సివచ్చింది. ఈ చిత్రవిజయం మొత్తం ‘ఫీమేల్ ఆర్టిస్ట్’లకు హెల్ప్ అయ్యిందని చెప్పాలి. ఎందుకంటే, ఈ చిత్రం తర్వాత ఇలాంటి పాత్రలను రచయితలు సృష్టిస్తున్నారు. ఈ చిత్రవిజయంతో అర్థవంతమైన సినిమా, కమర్షియల్ సినిమా మధ్య ఉండే గీత చెరిగిపోయిందని భావిస్తున్నాను’’ అన్నారు విద్యాబాలన్. ‘డర్టీ పిక్చర్’లో ఆమె చేసిన పాత్రకు ‘ఉత్తమ నటి’గా జాతీయ బహుమతి గెలుచుకున్నారు.