Posted: 02/10/2012 07:00 PM IST

ఇప్పుడు రాష్ట్రంలో ఎక్సైజ్ శాఖ ను చూసి చాలా మంది మంత్రులు భయంతో వణిపోతున్నారట. ఆ శాఖ ఒక చంద్రముఖిలా పట్టి .. ఆ శాఖను నిర్వహించే మంత్రులను లకలకలాడిస్తుందని కాంగ్రెస్ నాయకులు అంటున్నారు. గతంలో ఎక్సైజ్ శాఖను నిర్వహించి వారి తీరు ఎలా ఉందో ఒకసారి చూద్దాం. ఆ శాఖలో సిబ్బందికి టార్గెట్లు పెట్టి మరీ మందుబాబులతో తాగించి ఆదాయాన్ని పెంచుతున్న ఎక్సైజ్ మంత్రులకు.. జనం ఉసురు తగులుతున్నట్టుంది! మంత్రులనే కాదు.. ఈ శాఖలో కానిస్టేబుల్ స్థాయి నుంచి ఉన్నతాధికారులదాకా.. అందరినీ చేసిన పాపం కట్టికుదుపుతున్నట్టే ఉంది! గడచిన 20 ఏళ్లలో ఈ శాఖ మంత్రులందరికీ ఎదురైన అనుభవాలను గమనిస్తే ఇది నిజమేనని అర్థమవుతుంది. జక్కంపూడి రామ్మోహనరావు మినహా.. రెండు దశాబ్దాలుగా ఎక్సైజ్ మంత్రులుగా పనిచేసిన వారందరిపైనా చిన్నవో.. పెద్దవో ఆరోపణలు వస్తూనే ఉన్నాయి.

మర్రి చెన్నారెడ్డి హయాంలో ఆబ్కారీ శాఖ మంత్రిగా పనిచేసిన కనుమూరి బాపిరాజు డిస్టిలరీలకు అనుమతులివ్వడంలో నిబంధనలు ఉల్లంఘించారన్న ఆరోపణలపై అసెంబ్లీలో ప్రతిపక్షాలు నిలదీశాయి. దీంతో ఆయన తన పదవికి రాజీనామా చేశారు. తర్వాత టీడీపీ హయాంలో ఈ శాఖ మంత్రి నెట్టెం రఘురామ్ ఎక్సైజ్ బదిలీల్లో లంచాలు తీసుకున్నారన్న ఆరోపణలు ఎదుర్కొన్నారు. దీంతో, చంద్రబాబు ఆయన్ను తప్పించి మరొకరికి ఇచ్చారు. జీవన్‌రెడ్డి కూడా ఆరోపణలు ఎదుర్కొన్నారు. వైద్య, ఆరోగ్యశాఖ మంత్రి అయినా, మైదుకూరులో కల్తీసారా ఘటనతో డీఎల్ రవీంద్రారెడ్డి రాజీనామా చేశారు.

ఇక.. వైఎస్ హయాంలో జక్కంపూడి రామ్మోహన్‌రావు ఎక్సైజ్ మంత్రిగా బాధ్యతలు చేపట్టినప్పడికీ ఆయన అనారోగ్యంతో బాధపడుతుండటంతో వైఎస్సే ఆ శాఖ వ్యవహారాలన్నీ చూసుకునే వారు. దీంతో జక్కంపూడి ఆరోపణలు రాకుండా బయటపడ్డారు. తాజాగా కిర ణ్ కేబినెట్‌లో ఎక్సైజ్‌మంత్రిగా పనిచేస్తున్న మోపిదేవి వెంకట రమణారావుపై తీవ్ర ఆరోపణలు వెల్లువెత్తాయి. రాష్ట్రచరిత్రలో ఎన్నడూ లేని విధంగా ఎక్సైజ్ శాఖ మంత్రులు మద్యం కాటుకు బలైపోతున్నారని.. అన్నీ పార్టీ నాయకులు అనుకుంటున్నారు. ఇది తెలిని ఏ పార్టీ నాయకుడు ఎక్సైజ్ శాఖ జోలికి వెళ్లకూడదని మనస్సులో అనుకుంటున్నరని .. ఆ పార్టీ సీనియర్ నాయకులు అంటున్నారు.