Posted: 12/16/2011 06:10 PM IST

నారా చంద్రబాబు నాయుడు అంటే తెలియని వారు ఎవరు ఉండరు. కానీ చంద్రబాబు ముఖ్యమంత్రిగా ఉన్నప్పుడు అందజేసిన సైకిల్ ఆయనే ఇచ్చాడని తెలుసట కానీ చంద్రబాబు తెలియదట నారాకి. అన్నట్లు నారా అంటే ఎవరు అనుకుంటున్నారు కదూ.

తెలంగాణ జిల్లాల్లో రైతు పోరుబాటలో జరిగిన అరుదైన సంఘటన ఇది. అసలు విషయం ఏంటంటే....పై ఫోటోలో ఇటవైపు ఉన్నది మాజీ ముఖ్యమంత్రి నారా వారు.... అటువైపు ఉన్నది గీతకార్మికుడు నారా గౌడ్. ఇద్దరికీ అడ్డు సైకిలే. వారిద్దరి మధ్యా బంధం కూడా ఆ సైకిలే. చంద్రబాబు హయాంలో ఆదరణ పథకం కింద నారా గౌడ్ కి అధికారులు ఓ సైకిల్ ఇచ్చారు. దాన్ని ఇచ్చింది చంద్రబాబు అని తెలుసు కానీ... ఆయన ఎలా ఉంటారో నారాగౌడ్ కి తెలియకపోవడంతో ఇక్కడ ఓ తమాషా చోటు చేసుకుంది.

నిజామాబాద్ జిల్లా కొలిప్యాక్ నుంచి మనోహరాబాద్ వరకు చంద్రబాబు రైతుపోరు బాట సాగిస్తుండగా... నారాగౌడ్ ఎదురయ్యారు.  అతణ్ని ఆపిన బాబు... గీత పని ఎలా వుందని వాకబు చేశారు. గతంలో ఆదరణ పథకం కింద సైకిళ్ళు ఇచ్చామని, ప్రస్తుత ప్రభుత్వం ఏమైనా ఇచ్చిందా అని బాబు గారు అడగ్గా.... ‘‘ చంద్రబాబు ఉండగా సైకిళ్ళు ఇచ్చారు, ఇప్పటి ప్రభుత్వం ఏమీ ఇవ్వలేదు. చంద్రబాబే కొంత నయం అని’’ వ్యాఖ్యానించాడు. ప్రక్కనే ఉన్న ఎమ్మెల్యేలు ఈయనే చంద్రబాబు అని చెప్పడంతో.... ‘‘నిజమా... నువ్వు చంద్రబాబువా’’ అని నారాగౌడ్ ఆశ్చర్యపోయారు.

ఈ సంఘటనతో బాబుకు కొంత సేపు ఎటూ పాలు పోలేదు. ఇటు మంచిగా చెప్పినందుకు ఆనందించాలో, లేక నేనే తెలియకపోవడమా అని తలదించుకోవాలో ఆయనకు ఆ సమయంలో తెలియలేదని అనుకుంటున్నారు.