Posted: 12/16/2011 05:03 PM IST

సీత బాధలు సీతవి... పీత బాధలు పీతవి... అన్నట్లు ఉంది. తెలుగుదేశం ఎంపీ నామా నాగేశ్వరరావు పరిస్థతి. అందరు పార్లమెంటులో తలో అంశం పై మాట్లాడితే మనోడు మాత్రం తన ఆవేదనను వెల్లబోసుకున్నాడు. ఇంతకీ నామా బాధ ఏంటంటే.... ఆయనను ఎవరూ పట్టించుకోవడం లేదట. ఎక్కడ అంటే రాష్ట్రంలో. మొదట స్థానిక ఎంపీ అయిన తనకు ఖమ్మం జిల్లా అధికారులు ప్రొటోకాల్ మర్యాద పాటించటం లేదని నామా నాగేశ్వరరావు ఆగ్రహం వ్యక్తం చేశారు. పీఎంజీఎస్ వై రోడ్ల నిర్మాణానికి ప్రతిపాదనల్ని ఎంపీల నుంచి తీసుకోవాల్సి ఉందని, అలాగే రోడ్లకు శంకుస్థాపన చేయాల్సింది కూడా ఎంపీలేనన్న నిబంధనలు ఉన్నప్పటికీ జిల్లా అధికారులు తనను పట్టించుకోవటం లేదని చెప్పారు.

ఈ అంశంపై తాను జిల్లా కలెక్టర్, రాష్ట్ర ప్రొటోకాల్ కార్యదర్శి, ముఖ్యమంత్రి, కేంద్ర మంత్రులు, లోక్‌సభ స్పీకర్ సహా పలువురికి ఫిర్యాదు చేశానని, అయినా ఎవరూ స్పందించలేదని ఆరోపించారు. దీనికి కేంద్ర గ్రామీణాభివృద్ధి శాఖ మంత్రి జైరామ్ రమేశ్ సమాధానమిచ్చారు. పీఎంజీఎస్ వై పథకానికి ఎంపీల నుంచే ప్రతిపాదనలు తీసుకోవాలని, శంకుస్థాపనలకు ఎంపీలను ఆహ్వానించాలని, శిలాఫలకాలపై ఎంపీ పేరు కచ్చితం గా ఉండాలని చెప్పారు. ఈ మేరకు రాష్ట్రాలన్నింటికీ గతంలోనే స్పష్టమైన ఆదేశాలు జారీ చేశామని తెలిపారు. అయితే, తమ ఆదేశాలను అమలు చేయాల్సింది రాష్ట్రాలేనని ఆయన స్పష్టం చేశారు. ఎంపీల ఆవేదనను తప్పకుండా పరిష్కరిస్తామని పార్లమెంటరీ వ్యవహారాల శాఖ మంత్రి పవన్‌కుమార్ బన్సల్ తెలిపారు. అయితే అక్కడున్న వారు మాత్రం అధికారంలో ఉన్న మమ్మల్నే ఎవరు పట్టించుకోవడం లేదు. ఎంపీగా అధికారం ఉన్నా కేంద్రంలో మీకు సంబంధించిన వారు ఎవరు అధికారంలో ఉన్నారు. పవర్ ఉంటేనే పదవికి విలువ ఉంటుందని అనుకుంటున్నారు.