టాలీవుడ్ కమేడియన్ అలికి మాతృవియోగం

Posted: 12/19/2019 03:23 PM IST

తెలుగు సినీ ఇండస్ట్రీలో మరో విషాదం చోటు చేసుకుంది. ఇటీవల ప్రముఖ రచయత నటుడు గొల్లపూడి మారుతిరావు మరణంతో విషాదంలో మునిగిన టాలీవుడ్ వారం తిరగకుండానే మరో స్టార్ కమేడియన్ అలీ ఇంట్లో విషాదం సంభవించింది. ఆయనకు మాతృవియోగం సంభవించింది. ఆయన తల్లి జైతును బీబీ ఇవాళ తుదిశ్వాస విడిచింది. తీవ్ర అనారోగ్యంతో పాటు వృద్దాప్యంలో వున్న ఆమె సొంత ఊరు రాజమండ్రిలో కన్నుమూశారు.

ప్రస్తుతం అలీ ఓ సినిమా షూటింగ్ లో భాగంగా రాంచీలో ఉన్నారు. తల్లి మరణవార్త తెలుసుకున్న అలీ హుటాహుటినా హైదరాబాద్ బయలు దేరారు. మరోవైపు అలీ తల్లి జైతును బీబీ పార్ధివ దేహాన్ని హైదరాబాద్ తరలించే ఏర్పాట్లు చేస్తున్నారు అలీ బంధువులు. ఈ రోజు సాయంత్రం ఆమెకు అంత్యక్రియలు నిర్వహించనున్నట్లు సమాచారం. కాగా, అలికి మాతృవియోగం సంభవించన క్రమంలో ఆయనకు సినీ, రాజకీయ రంగాల నుంచి ప్రముఖులు సానుభూతి వ్యక్తం చేస్తున్నారు.

అలీకి కన్నతల్లిపై ఉన్న ప్రేమను పలు సందర్భాల్లో గుర్తు చేసుకునేవారు. తాను ఈ రోజు ఈ స్థాయిలో ఉన్నానంటే తల్లిదండ్రులే కారణం అని ఎపుడు చెబుతూ ఉండేవారు. ఇప్పటికే అలీ తన తండ్రి పేరిట సామాజికి కార్యక్రమాలు చేస్తున్న సంగతి తెలిసిందే. అలీ తల్లి మృతిపై పలువురు సినీ, రాజకీయ ప్రముఖలు తీవ్ర సంతాపం వ్యక్తం చేసారు.

హాస్యనటుడు అలీ తల్లి జైతును బీబీ మృతిపై జనసేన పార్టీ అధినేత పవన్ కల్యాణ్ దిగ్భ్రాంతి వ్యక్తం చేశారు. ఈ మేరకు ఓ ప్రకటన విడుదల చేశారు. ఆమె తుదిశ్వాస విడిచారన్న వార్త పట్ల తాను తీవ్ర దిగ్భ్రాంతికి గురయ్యానని చెప్పారు. ఆమె పవిత్ర ఆత్మకు శాంతి చేకూరాలని ఆకాంక్షించారు. అలీకి తన తల్లితో ఉన్న అనుబంధం ఎంత బలమైందో తనకు తెలుసని, ఆయన కుటుంబానికి తన ప్రగాఢ సానుభూతి తెలియజేస్తున్నానని చెప్పారు.