‘మా’లో విభేదాలు.. నరేశ్ తప్పుకోవాల్సిందే..

Posted: 09/12/2019 07:20 PM IST

మూవీ ఆర్టిస్ట్స్ అసోసియేషన్ (మా)లో విభేదాలు తారస్థాయికి చేరాయి. అధ్యక్షుడు నరేశ్, కార్యనిర్వాహక ఉపాధ్యక్షుడు రాజశేఖర్ ల మధ్య స్నేహం దెబ్బతినగా, రాజశేఖర్ వర్గం తీవ్రంగా స్పందించింది. నరేశ్ అధ్యక్ష పదవి నుంచి తప్పుకోవాలంటూ షోకాజ్ నోటీసులు ఇచ్చింది. గత ఎన్నికల్లో 'మా' అధ్యక్షుడిగా నరేశ్ గెలుపొందగా, కార్యదర్శిగా జీవిత గెలిచిన సంగతి తెలిసిందే. శివాజీరాజా నుంచి అధ్యక్ష పగ్గాలను అందుకున్న నరేశ్ కు తాజాగా ఇబ్బందులు వచ్చిపడ్డాయి.

అయితే తొలి రోజు నుంచే నరేశ్ వైఖరిపై రాజశేఖర్ అసంతృప్తిని వ్యక్తం చేస్తూనే ఉన్నారు. ప్రమాణ స్వీకారం చేసిన రోజునే నరేశ్ 'నేను' అన్న పదం వాడుతూ మాట్లాడగా, రాజశేఖర్ నవ్వుతూనే విమర్శలు గుప్పిస్తూ, 'నేను కాదు... మేమంతా అనాలి' అంటూ చురకలేసిన సంగతి తెలిసిందే. మా అసోసియేషన్ కార్యవర్గ సమావేశాలకు కూడా హాజరుకాకుండా నరేశ్ నిర్లక్ష్యంగా వ్యవహరిస్తున్నారని ప్రత్యర్థి వర్గం అరోపిస్తోంది.

నరేశ్ ఆత్వర్యంలో మా అసోసియేషన్ కార్యవర్గ సమావేశ అనుమతి లేకుండా పలు కార్యక్రమాల నిర్వహణకు సుముఖత వ్యక్తం చేశారని కూడా అరోపణలు వున్నాయని రాజశేఖర్ వర్గం సభ్యులు అంటున్నారు. ఆ కార్యక్రమాల విషయాన్ని పక్కనబెడితే.. ఇవి కాకుండా నరేశ్ పై పలు పిర్యాదులు నమోదయ్యాయని, వాటన్నింటిపై ఆయన వివరణ ఇవ్వాలని రాజశేఖర్ వర్గం డిమాండ్ చేస్తోంది.