‘‘ఇదం జగత్’’ చిత్రంలో సరికొత్త కీలక పాత్ర

Posted: 12/26/2018 03:43 PM IST

వైవిద్యభరితమైన కథలను ఎంచుకుని మరీ రోటీన్ కు భిన్నమైన పాత్రలను చేస్తూ వస్తున్నాడు హీరో సుమంత్. సుమంత్ హీరోగా రూపోందుతున్న 'ఇదం జగత్' సినిమా ఈ నెల 28వ తేదీన ప్రేక్షకులను పలకరించనుంది. ఇటీవల విడుదలైన ఆయన చిత్రం సుబ్రహ్మణ్యపురం అంచనాలకు తగ్గటుగా వసూళ్లను రాబట్టలేకపోయినా.. పరవాలేదని అనిపించుకుంది. అయితే తాజాగా విడుదల అవుతున్న ఇదం జగత్ చిత్రంపైనే ఆయన అశలు పెట్టుకున్నారు.

ఈ చిత్రంలో సుమంత్ కు జోడీగా అంజు కురియన్ నటించింది. ఈ చిత్రానికి శ్రీకాంత్ నీలకంఠం దర్శకత్వం వహిస్తున్నాడు. ఈ నెల 19న విడుదలైన ఈ చిత్ర ట్రైయిలర్ ప్రేక్షకులను అకట్టుకుంటుంది. సినిమా కూడా అంచనాలకు తగ్గట్టుగా వుంటే సుమంత్ కు చాలా రోజుల తరువాత హిట్ దక్కినట్టే అవుతుంది. ఈ సినిమాను గురించి సుమంత్ ప్రస్తావించాడు."ఇది డార్క్ డ్రామా థ్రిల్లర్ గా నిర్మితమైంది. ఈ తరహా సినిమాను నేను చేయడం ఇదే మొదటిసారి. ఈ సినిమాలో నేను ఒక రిపోర్టర్ గా కనిపిస్తాను.

ఈ సినిమాలో నేను హీరోను అని గానీ .. విలన్ ను అని గాని చెప్పను. ఈ రెండింటికి అతీతంగా నా పాత్ర ఉంటుంది. ఒక రిపోర్టర్ స్వార్థపరుడైతే అతను ఏం చేయగలడు? దాని పర్యవసానాలు ఎలా ఉంటాయి? అనేది ఆసక్తికరంగా ఉంటుంది. ప్రెస్ లోని మరో కోణాన్ని ఈ సినిమా ఆవిష్కరిస్తుంది. ఒక్క మాటలో చెప్పాలంటే ఈ సినిమాతో నేను ఒక ప్రయోగమే చేశాను. ఈ ప్రయోగం తప్పకుండా సక్సెస్ అవుతుందనే నమ్మకం వుంది" అని చెప్పుకొచ్చాడు.