ఫస్ట్ లుక్: తెలుగుదనం ఉట్టిపడేలా.. బసవతారకంగా విద్యాబాలన్

Posted: 10/17/2018 08:24 PM IST

First look of vidya balan as basavatarakam from ntr biopic

ఎన్టీఆర్ బయోపిక్ చిత్రానికి సంబంధించి ఒక్కో పాత్రను రివీల్ చేస్తూ ఈ చిత్రంపై అంతకంతకూ అంచనాలను పెంచేస్తోంది చిత్ర యూనిట్. ఎన్టీఆర్, చంద్రబాబు, శ్రీదేవి, నాగేశ్వరరావు, హరిక్రిష్ణ, దగ్గుబాటి వెంకటేశ్వరరావు, టైగర్ హెచ్ ఎం రెడ్డి పాత్రలకు సంబంధించిన ఫస్ట్‌లుక్‌లు ఇప్పటికే విడుదల కాగా.. తాజాగా ఎన్టీఆర్ సతీమణి బసవతారకం ఫస్ట్ లుక్‌ను బయటకు వచ్చింది. ఈ పాత్రలో ప్రముఖ బాలీవుడ్ నటి విద్యా బాలన్ నటిస్తున్న సంగతి తెలిసిందే.

విద్యాబాల‌న్ త‌న సోషల్ మీడియా ద్వారా బ‌స‌వ‌తార‌కం లుక్ లో ఉన్న ఫోటోని షేర్ చేస్తూ ‘నేనేం చూస్తున్నాను’ అంటూ కామెంట్ పెట్టింది. తెలుగుదనం ఉట్టిపడేలా చేనేత చీరను ధరించి నుదుటున పెద్ద బొట్టు.. చేతి నిండా గాజులు.. తల్లో మల్లె పూలు ధరించి అద్దం ముందు అమాయకంగా చూస్తూ ఉన్న బసవతారకం ఫస్ట్‌ లుక్ ప్రేక్షకుల్ని ఆకట్టుకునే విధంగా ఉంది. ఈ పాత్రకు జీవింపోసినట్టుగా విద్యాబాలన్ లుక్ ఉంది ఆమె అభిమానులు పొగడ్తలు కురిపిస్తున్నారు.

వారాహి చలనచిత్ర, విబ్రి మీడియా సమర్పణలో సాయి కొర్రపాటి, విష్ణు వర్థన్ ఇందూరి, నందమూరి బాలకృష్ణ ఈ సినిమాను నిర్మిస్తున్నారు. ఈ చిత్రంలో ఎన్టీఆర్‌గా లీడ్‌ రోల్‌లో బాలయ్య, చంద్రబాబుగా రానా, హరిక్రిష్ణగా కళ్యాణ్ రామ్, శ్రీదేవిగా రకుల్ ప్రీత్ సింగ్, నాగేశ్వరరావుగా సుమంత్, దగ్గుబాటి వెంకటేశ్వరరావుగా భరత్ రెడ్డి, ‘టైగర్’ హెచ్.ఎం.రెడ్డిగా కైకాల సత్యనారాయణ, దగ్గుబాటి వెంకటేశ్వరరావుగా భరత్ రెడ్డి, పురంధరేశ్వరిగా విజయవాడకు చెందిన హిమాన్సి చౌదరి తదితరులు నటిస్తున్నారు.

ఎం.ఎం.కీరవాణి ఈ చిత్రానికి సంగీతం అందిస్తున్నారు. సంతోష్ తుండియల్ ఛాయాగ్రహణం, కోటగిరి వెంకటేశ్వరరావు ఎడిటింగ్, బుర్రా సాయిమాధవ్ మాటలు అందిస్తున్న ఈ క్రేజీ ప్రాజెక్ట్ మూవీని రెండు భాగాలుగా విడుదల చేస్తున్నారు. చిత్ర తొలి భాగం ‘క‌థానాయ‌కుడు’ పేరుతో జ‌న‌వరి 9న విడుద‌ల కానుండ‌గా, రెండో భాగం ‘మ‌హానాయ‌కుడు’ పేరుతో జ‌న‌వ‌రి 24న విడుదల కానుంది.