అల్లువారింట అట్టహాసంగా చిరంజీవి జన్మదిన వేడుకలు..

Posted: 08/23/2018 11:08 AM IST

టాలీవుడ్ మెగాస్టార్ చిరంజీవి 64వ పడిలోకి అడిగిడిన సందర్భాన్ని పురస్కరించుకుని స్టార్ ప్రోడ్యూసర్, అల్లు అరవింద్ తన నివాసంలో ఏర్పాటు చేసిన జన్మదిన వేడుకలు అట్టహాసంగా జరిగాయి. ఈ కార్యక్రమంలో కుటుంబసభ్యులతో పాటు కొందరు ఫ్యామిలీ ఫ్రెండ్స్ మాత్రమే పరిమితం కాగా, ఈ గ్రాండ్ ఈవెంట్ లో పలువురు చిరంజీవి సన్నిహితులు, సినీ, రాజకీయ రంగంతో పాటు విభిన్న రంగాలకు చెందిన పలువురు ప్రముఖులు కూడా హాజరయ్యారు.

మెగా కుటుంబంతో పాటు అల్లు కుటుంబం జరుపుకున్న ఈ చిరంజీవి జన్మదిన వేడుకలలో జనసేన అధినేత పవన్ కల్యాణ్ కూడా హాజరై సందడి చేయడం విశేషం. మరీ ముఖ్యంగా సినీపరిశ్రమకు చెందిన నిర్మాతలు, దర్శకులతో ఆయన సరదాగా గడిపారు. చిత్రపరిశ్రమకు చెందిన ప్రముఖ ధర్శకులు బోయపాటి శ్రీను, వక్కంతం వంశీ, వంశీ పైడిపల్లి, కొరటాల శివ, సుకుమార్, మెహర్ రమేష్, పరుశురామ్ తదితరులు కూడా హాజరయ్యారు.

ఈ సందర్భంగా అల్లు అరవింద్ ప్రత్యేకంగా తెప్పించిన కేక్ ను చిరంజీవి కట్ చేసి తన సహధర్మచారిణి అయిన సురేఖకు తినిపించారు. ఆ తరువాత అల్లు అరవింద్ చిరంజీవికి కేక్ తినిపించారు. అనంతరం వేడుకకు హాజరైన ప్రముఖులు ఒక్కోక్కరుగా చిరంజీవికి కేక్ తినిపించి.. జన్మదిన శుభాకాంక్షలను తెలియజేశారు. ఈ కార్యక్రమంలో ఆంధ్రప్రదేశ్ విద్యాశాఖ మంత్రి గంటా శ్రీనివాసరావు, మరో టీడీపీ నేత రఘురామ క్రిష్ణంరాజు, జనసేన పార్టీ కోఅర్డినేషన్ కమిటీ సభ్యుడు దిలిప్ బైరా సహా పలువురు ప్రముఖులు హాజరయ్యారు.