ఉద్యమసింహంగా కేసీఆర్ బయోపిక్.. లీడ్ రోల్ లో నాజర్..

Posted: 06/28/2018 06:51 PM IST

వెండితెరపై ప్రస్తుతం బయోపిక్స్ చిత్రాల హవా కొనసాగుతుంది. క్రికెట్ లెజెండ్ సచిన్ టెండుల్కర్, ధోని తరువాత సంజుతో త్వరలో ధియేటర్లకు రానున్న ప్రముఖ సినీనటుడు సంజయ్ దత్.. వస్తున్న విషయం తెలిసిందే. ఇక ఇటు తెలుగునాట కూడా బియోపిక్స్ కు మంచి ఆదరణ ఏర్పడుతోంది. యువ దర్శకులు, నిర్మాతలు సమాజంలోని ప్రముఖ వ్యక్తుల జీవితాలను తెరపై ఆవిష్కరించేందుకు ఉత్సాహం చూపుతున్నారు. ఇప్పటికే స్వర్గీయ నందమూరి తారక రామారావు జీవిత చరిత్ర ఆధారంగా ఎన్టీఆర్ బయోపిక్ మొదలైంది.

ఈ చిత్రానికి క్రిష్ దర్శకత్వం వహించనుండగా, బాలకృష్ణ టైటిల్ రోల్లో మెరవనున్నారు. ఇటీవలే అలనాటి మేటి నటి సావిత్రి బయోపిక్ ను వెండితెరపై అవిష్కరించి.. అన్ని వర్గాల ప్రేక్షకుల ప్రశంసలతో పాటు సినీదిగ్గాజాల మన్ననలను కూడా పోందారు దర్శకులు. ఇదే క్రమంలో దిగవంతనేత రాజశేఖర్ రెడ్డి జీవిత చరిత్ర ఆధారంగా యాత్ర పేరుతో ఓ బయోపిక్ తాజాగా మొదలైంది. మమ్ముట్టి ప్రధాన పాత్రలో కనిపించనుండగా, మహి రాఘవ్ దర్శకత్వం వహిస్తున్నారు.

ఇప్పుడు ఇదే కోవలో తెలంగాణ రాష్ట్ర ఉద్యమ సారధి, ముఖ్యమంత్రి కేసీఆర్ జీవిత చరిత్ర ఆధారంగా ఓ బయోపిక్ రూపొందుతోంది. మొదట్లో కేసీఆర్ పాత్రలో ప్రకాష్ రాజ్ నటిస్తారని ప్రచారం జరిగినా, చివరకి విలక్షణ నటుడు నాజర్ ని ఫైనల్ చేశారట. ఉద్యమ సింహం అనే పవర్ ఫుల్ టైటిల్ తో రూపొందుతున్న ఈ చిత్రాన్ని కృష్ణం రాజు తెరకెక్కించనున్నారు. కల్వకుంట్ల నాగేశ్వర్ రావు నిర్మాణంలో ఈ బయోపిక్ రూపొందనుంది. ఇవాళే అన్నపూర్ణ స్టూడియోస్ లో అధికారికంగా లాంచ్ చేసుకున్న ఈ సినిమా త్వరలోనే రెగ్యులర్ షూటింగ్ కు వెళ్లనుంది.