ఎన్టీఆర్ బయోపిక్ చిత్రానికి దర్శకత్వ బాధ్యత..?

Posted: 04/28/2018 05:13 PM IST

తండ్రి బాటలో తనయుడు నడిస్తే ఆ ఆనందమే వేరు. దివంగత ముఖ్యమంత్రి, పేదల పెన్నిది, విశ్వవిఖ్యాత నటుడు ఎన్టీఆర్ జీవిత కథ ఆధారంగా తెరకెక్కుతున్న 'ఎన్టీఆర్' చిత్రానికి సంబంధించిన ఇప్పుడు ఆ అనందాన్నే పోందాలని భావిస్తున్నాడట నందమూరి వారసుడు బాలకృష్ణ. తన తండ్రి ఎన్టీఆర్ మాదిరిగానే తాను కూడా దర్శకత్వ బాద్యతలను చేపట్టానున్నారన్న టాక్ ఇప్పుడు టాలీవుడ్ వర్గాల్లో సంచలనంగా మారింది. ఈ చిత్రానికి బ్రహ్మతేజ ప్రోడక్షన్స్ పేరుతో నిర్మాణ బాధ్యతలను చేపట్టిన బాలకృష్ణ.. ఇక మెగాఫోన్ ను కూడా పట్టాలని యోచిస్తున్నారన్న వార్త నెట్టింట్లో వైరల్ గా మారింది.

ఈ చిత్రానికి ఎన్టీఆర్ అభిమాని అయిన తేజకు దర్శకత్వ బాధ్యతలను అప్పగించినా.. ఆయన తాను ఈ చిత్రానికి న్యాయం చేయలేనేమోనన్న అందోళనతో దర్శకత్వం బాధ్యతల నుంచి తప్పుకున్న విషయం తెలిసిందే. మరి కొన్ని రోజుల్లో ఈ చిత్రం సెట్స్ మీదకు వెళ్తుంది అనుకుంటుండగా... తేజ తీసుకున్న నిర్ణయంతో ఈ సినిమాకు దర్శకత్వం ఎవరు వహిస్తారు? అనే ప్రశ్న అందరిలోనూ తలెత్తింది. రాఘవేంద్రరావు, కృష్ణవంశీ, వైవీయస్ చౌదరి, క్రిష్ తదితరుల పేర్లు తెరపైకి వచ్చాయి. అయితే, ఇప్పుడు కొత్త పుకారు ఒకటి వైరల్ అవుతోంది. బాలయ్యే ఈ సినిమాకు దర్శకత్వం వహించనున్నారనేదే ఆ పుకారు. ఈ వార్త ఇప్పుడు సంచలనం రేకెత్తిస్తోంది.

అయితే ఈ సినిమాకు తానే దర్శకత్వం వహిస్తే ఎలా ఉంటుందని బాలయ్య ఆలోచిస్తున్నారట. మెగా ఫోన్ పట్టుకోవాలని గతంలోనే బాలయ్య భావించారు. 'నర్తనశాల' సినిమాను తెరకెక్కించాలని అనుకున్నారు. అయితే, ఆ సినిమాలో ద్రౌపదిగా అనుకున్న సౌందర్య చనిపోవడంతో... ఆ చిత్రం అర్ధాంతరంగా ఆగిపోయింది. ఇప్పుడు 'ఎన్టీఆర్' చిత్రానికి తానే దర్శకత్వం వహించాలని బాలయ్య అనుకుంటున్నారన్న వార్తలో ఎంత వరకు నిజం ఉందో రానున్న రోజుల్లో తేలిపోనుంది.