విశాల్ కు మద్దతుగా వ్యాఖ్యలు చేసిన శరత్ కుమార్

Posted: 12/13/2017 10:27 AM IST

నటుడు శరత్ కుమార్, హీరో విశాల్ మధ్య ఉన్న వైరం గురించి ప్రత్యేకంగా చెప్పాల్సిన అవసరం లేదు. శరత్ కుమార్ వర్గ అవినీతిని ప్రశ్నిస్తూ నడిగర్ సంఘ ఎలక్షన్ లలో విశాల్ పోటీ చేయటం.. అతని వర్గాన్ని గెలిపించుకోవటం.. తర్వాత నిర్మాతల మండలి చైర్మన్ గా గెలిచి తన సత్తా చూపించుకోవటం.. ఈ మధ్యలో శరత్ కుమార్.. ఆయన భార్య రాధిక.. ఇతర వర్గీయుల నుంచి విశాల్ పై విమర్శలు రావటం చూస్తున్నాం.

అయితే ఇప్పుడు విశాల్ రాజకీయ ఆరంగ్రేటాన్ని తప్పు పడుతూ కోలీవుడ్ స్టార్లంతా ఆయనకు వ్యతిరేకంగా ప్రదర్శనలు, విమర్శలు చేస్తున్నారు. ఈ క్రమంలో విశాల్ కు ఓ సీనియర్ హీరో మద్దతు లభించటం సర్వత్రా ఆసక్తికరంగా మారింది. విశాల్ ఎన్నికల్లో పోటీ చేయడంలో తప్పేముందని సీనియర్ నటుడు శరత్ కుమార్ చెబుతున్నారు. ఏఎస్‌కే(అకౌంటబుల్, సక్సెస్ ఫుల్, నాలెడ్జబుల్ సిటిజన్స్) పేరిట ఓ యాప్ ను రూపకల్పన చేశారు. ఇది ఆల్ ఇండియా సమతువ మక్కల్ కట్చి పార్టీ అధినేత అయిన శరత్ కుమార్ కోసమే తయారు చేశారు.

దీనిని మంగళవారం చెన్నైలో శరత్ కుమార్ ఆవిష్కరించారు. ఈ సందర్భంగా ఆయన మాట్లాడుతూ.. ప్రజలతో మమేకమయ్యేందుకే ఈ యాప్‌ను రూపొందించినట్టు తెలిపారు. ఈ సందర్భంగా ఆయన విశాల్ ఆర్కే నగర్ నామినేషన్ తిరస్కరణ వ్యవహారంపై స్పందిస్తూ... ఓటు హక్కు ఉన్న ప్రతి ఒక్కరూ ఎన్నికల్లో పోటీ చేయవచ్చని, విశాల్ పోటీ చేయడంలో తప్పేంటని ప్రశ్నించారు. కొందరు కావాలనే ఈ అంశాన్ని పెద్దది చేయాలని చూస్తున్నారన్నారు.

గతంలో ఎంజీఆర్ నామినేషన్ కూడా తిరస్కరణకు గురైన సందర్భాలు ఉన్నాయని ఈ సందర్భంగా గుర్తు చేశారు.నటీనటుల సంఘంలో ఐక్యత లోపించిందన్న శరత్ కుమార్, సమస్యల పరిష్కారానికి అందరూ ఏకతాటిపైకి వచ్చి కృషి చేయాలని కోరారు. ఈ కార్యక్రమంలో రాధిక, ఆమె కుమార్తె రయాన్, నటి వరలక్ష్మి తదితరులు పాల్గొన్నారు

బలపడుతున్న పుకార్లు.. 

కాగా, గత కొంత కాలంగా శరత్ కుమార్ కు విశాల్ దగ్గరయ్యేందుకు ప్రయత్నిస్తున్నాడంటూ కోలీవుడ్ లో ఓ పుకారు చక్కర్లు కొడుతోంది. శరత్ కుమార్ కూతురు వరలక్ష్మి, విశాల్ ఆ మధ్య ప్రేమలో ఉండటం.. విశాల్-శరత్ కుమార్ మధ్య గొడవ నేపథ్యంలో దానికి బ్రేక్ పడిందన్న గుసగుసలు అప్పట్లో వినిపించాయి. నడిగర్ సంఘం భవనం పూర్తయ్యాక తొలి వివాహం తనదేనని విశాల్ గుర్తు చేశాడు. ఇక ఇప్పుడు పరిస్థితులు చూస్తుంటే విశాల్-వరలక్ష్మి వివాహానికి లైన్ క్లియర్ అవుతోందని ఆ కథనాల సారాంశం.