ఫోర్భ్స్‌ టాప్‌ 10 సంపన్న మోడళ్లు

Posted: 11/22/2017 03:50 PM IST

హాలీవుడ్ మోడల్ కెందల్ల్ జెన్నర్ మరో కొత్త రికార్డు క్రియేట్ చేసింది. అత్యధిక సంపాదనతో ఈ ఏడాది మోడళ్లలో అగ్రగామిగా నిలిచింది. ఈ మేరకు ఫోర్భ్స్ విడుదల చేసిన జాబితాలో 22 మిలియ‌న్ డాల‌ర్లు సంపాదించినట్లు తెలుస్తోంది.

22 ఏళ్ల కెండ‌ల్ జూన్, 2016 - జూన్, 2017 మ‌ధ్య కాలంలో ఈ సంపాదనను వెనకేసుకుంది. ఎస్టీ లాడ‌ర్‌, అడిడాస్ వంటి సంస్థ‌ల‌కు మోడలింగ్ చేయ‌డంతో పాటు, త‌న సోద‌రి కైలీ జెన్న‌ర్‌తో క‌లిసి చేస్తున్న టీవీ షోల ద్వారా ఆమె పెద్ద‌ మొత్తంలో ఆర్జించించారు. అలెగ్జాండర్ వాంగ్, ఫెండి, ఛానెల్, మార్క్ జాకోబ్స్ తదితరులకు ఆమె ర్యాంప్ వాక్ చేశారు. కర్దాషియన్(కిమ్ తదతరులు..) కుటుంబానికి చెందిన కెందల్ల్, జిసెల్ బుండ్‌చెన్ క్రిస్సీ టైజెన్, అడ్రియానా లిమా, గిగీ హదిద్ లను వెనక్కి నెట్టేసింది.

ఈ జాబితాలో గత 15 ఏళ్లుగా మొదటి స్థానంలో ఉన్న జిసెల్ 17.5 మిలియన్ డాలర్ల సంపాదనతో రెండో స్థానానికి పడిపోయింది. క్రిస్సీ టైజ‌న్ (13.5 మిలియ‌న్ డాల‌ర్లు)తో మూడో స్థానంలో నిలిచింది. ఇక కెందల్ల్ గతేడాది 10 మిలియన్ డాలర్లు మాత్రమే సంపాదించగా.. ఈ యేడాది అది రెట్టింపు కావటం గమనార్హం.కాగా, ఈ ఏడాది టాప్ 10లో ఉన్న మోడ‌ళ్ల సంపాదన మొత్తం కలిపి 109.5 మిలియ‌న్ డాల‌ర్లుగా ఫోర్బ్స్ పేర్కొంది.