రాజకీయాల్లోకి అస్సలు రాను-కమల్

Posted: 08/11/2017 08:14 AM IST

తమిళనాడులో రజనీకాంత్, కమల్ హాసన్లు రాజకీయ చదరంగం ఆడుతున్నారు. ఓవైపు ఆసక్తి లేదంటూనే దేవుడు శాసిస్తే తప్పక వస్తానంటూ తికమక ప్రకటనలతో అభిమానులను, రాజకీయ వర్గాలను అయోమయంలోకి నెట్టేస్తున్నారు తలైవా. ఇప్పుడు లోకనాయకుడు కూడా అదే బాటలో ప్రయాణిస్తున్నాడేమో అనిపిస్తుంది.

కమల్ ఈ మధ్య రాజకీయాలపై తీవ్ర స్థాయిలోనే కామెంట్లు చేస్తున్నారు. ఈ నేపథ్యంలోనే ఆయన రావటం దాదాపు ఖాయమనే అంతా భావించారు. కానీ, చెన్నైలో జరిగిన డీఎంకే అధికార పత్రిక ‘మురసోలి’ వజ్రోత్సవంలో పాల్గొన్న కమల్ చేసిన వ్యాఖ్యలు అర్థం కాకుండా ఉన్నాయి. డీఎంకేలో చేరతారనే వార్తల నేపథ్యంలో స్టాలిన్ సమక్షంలోనే తనకు అసలు సమకాలీన రాజకీయాల్లోకి వచ్చే ఉద్దేశం లేదని కమల్ హాసన్ స్పష్టం చేశారు.

రాజకీయాల్లోకి రావాలనుకుంటే 1983లోనే వచ్చేవాడినని, ఆ సమయంలో డీఎంకే అధినేత కరుణానిధి తన పార్టీకి ఓ టెలిగ్రాం ద్వారా ఆహ్వానించాడంటూ కమల్ చెప్పారు. అసలు తనకు ఆ ఉద్దేశం లేదు కాబట్టే ఇప్పటికీ దానికి సమాధానం ఇవ్వలేదని పేర్కొన్నాడు. ఇక ఈ కార్యక్రమానికి హాజరుకాడని భావించిన రజనీకాంత్ కమల్ మాట్లాడుతున్నంత సేపు ఆసక్తిగా గమనించటం హైలెట్ అయ్యింది. ఏదిఏమైనా వీరిద్దరు రాజకీయరంగ ప్రవేశంపై హైడ్రామా ఇంకొన్నాళ్లు తప్పేలా కనిపించటం లేదు.