కట్టప్ప కూతురి దేశభక్తి.. చంపుతామని వార్నింగ్.. పీఎంకి లేఖ

Posted: 07/15/2017 11:52 AM IST

అప్పటిదాకా నటుడిగా కేవలం సౌత్ వరకే తన పేరును పదిలపరుచుకున్న నటుడు సత్యరాజ్ బాహుబలితో ఒక్కసారిగా దేశవ్యాప్తంగా పాపులర్ అయిపోయాడు. అయితే తన పిల్లలకు పూర్తి స్వేచ్ఛనిచ్చిన ఆయన వారి విషయాల్లో ఏనాడూ జోక్యం చేసుకోలేదు కూడా. కొడుకు శిబిరాజ్ హీరోగా కొనసాగుతుంటే.. దివ్య మాత్రం న్యూట్రీషియన్ గా సెటిల్ అయిపోయింది. అయితే ఆ ఫ్రోఫెషనల్ లో ఆమెకు ఎదురైన చేదు అనుభవాలను వివరిస్తూ ఏకంగా ప్రధాని మోదీకే ఓ లేఖ రాసింది.

దివ్య చెన్నైలో ఓ క్లినిక్ ను రన్ చేస్తోంది. ‘‘నేను ఓ ప్రోఫెషనల్ న్యూట్రీషియన్ ను మాత్రమే. వైద్యురాలిని కాదు. అందుకే విటమిన్స్, హెల్త్ డ్రింక్స్ ను మాత్రమే ఫేషెంట్లకు సూచిస్తాను. కొన్ని రోజుల క్రితం ఓ ఇద్దరు ఫారినర్లు, ఓ ఇండియన్ తో కలిసి నా దగ్గరికి వెళ్లారు. నిషేధిత మందులను నా ముందుంచి పేషంట్లకు ప్రిస్క్రైబ్ చేయాల్సిందిగా సూచించారు. నేను ససేమిరా అనటంతో లంచం ఇవ్వడానికి యత్నించారు. కానీ, నేను వినకపోవటంతో అక్కడి నుంచి వెళ్లిపోయారు.

సాయంత్రం అయ్యాక నేను, నా సిబ్బంది ఇద్దరం ఉన్న సమయంలో మళ్లీ వచ్చి బెదిరింపులకు దిగారు. మాకు రాజకీయ సంబంధాలు ఉన్నాయి. నిన్ను చంపేస్తామంటూ హెచ్చరించారు. అయినా నాకు భయం లేదు. దేశానికి ప్రమాదకరంగా మారుతున్న అలాంటి మందులను నిషేధించాల్సిన అవసరం ఉంది’’ అంటూ లేఖలో పేర్కొంది. తన కుమార్తె ప్రధానికి లేఖ రాసినట్టు సత్యరాజ్ ఓ ప్రకటన ద్వారా తెలిపాడు. చంపుతామని బెదిరించినప్పటికీ తన కూతురికి దేశంపై ఎంత అభిమానం ఉందో ఈ ఘటన నిరూపించిందని సంతోషం వ్యక్తం చేశాడు. కేంద్ర ప్రభుత్వం ఆమోదం లేని, అపాయకరమైన మందులను పూర్తిగా నిషేధించాలని తన ప్రకటనలో ఆయన కోరాడు.