ధనుష్ ఒరిజినల్ తల్లిదండ్రులు ఎవరు?

Posted: 11/26/2016 01:21 PM IST

కోలీవుడ్ హీరో, సూపర్ స్టార్ రజనీకాంత్ అల్లుడు ధనుష్ కి పెద్ద షాక్ తగిలింది. మెలూరు మెజిస్ట్రేట్ కోర్టు ఈ స్టార్ హీరోకి సమ్మన్లు జారీ చేసింది. ధనుష్ తమ కొడుకేనంటూ ఓ జంట కోర్టును ఆశ్రయించగా, విచారణ చేపట్టిన కోర్టు నోటీసులు పంపించింది.

మధురై జిల్లా మేలూరు సమీపంలోని మలంపట్టికి చెందిన కదారేశన్(60), మీనాళ్ (55) దంపతులు ఈ పిటిషన్ ను వేశారు. ధనుష్ తమ కుమారుడే అని... అతని ఒరిజినల్ పేరు కలిసెల్వన్ అని, ఇప్పుడు ధనుష్ కే రాజాగా మార్చేసుకున్నాడని పిటిషన్ లో వారు పేర్కొన్నారు. చిన్నప్పుడు సరిగా చదువుకోవడం లేదని మందలించడంతో... సినిమాల్లో నటించడానికి చెన్నై వెళుతున్నానని, తన కోసం వెతకవద్దని లేఖ రాసి ఇంటి నుంచి వెళ్లిపోయాడని తెలిపారు.

ధనుష్ తమ కుమారుడే అని నిరూపించడానికి డీఎన్ఏ టెస్టులకు కూడా రెడీనే అని వారు చెప్పారు. తమకు నెలకు 65,000 రూపాయలు భరణంగా ఇప్పించాలని వారు కోర్టును కోరారు. తాము చెబుతున్నది నిజం అని నిరూపించడానికి తమ వద్ధ పలు ఆధారాలు ఉన్నాయని తెలిపారు.

ఈ నేపథ్యంలో, పిటిషన్ ను విచారించిన కోర్టు జనవరి 12న కోర్టుకు స్వయంగా హాజరుకావాలని ధనుష్ కు సమన్లు జారీ చేసింది.