అక్షయ్ కుమార్ పై ‘2.0’ దర్శకుడి ప్రశంసలు

Posted: 03/24/2016 10:34 AM IST

‘కొచ్చడయాన్’, ‘లింగ’ వంటి భారీ అట్టర్ ఫ్లాప్ చిత్రాల తర్వాత తమిళ సూపర్ స్టార్ రజనీకాంత్ నటిస్తున్న తాజా చిత్రం ‘2.0’. ప్రముఖ దర్శకుడు శంకర్ దర్శకత్వంలో రూపొందుతున్న ఈ చిత్రాన్ని భారీ బడ్జెట్ తో ప్రముఖ నిర్మాణ లైకా సంస్థ నిర్మిస్తుంది. ఏఆర్ రెహమాన్ సంగీతం అందిస్తున్నాడు. ఎమీ జాక్సన్ హీరోయిన్.

బాలీవుడ్ స్టార్ హీరో అక్షయ్ కుమార్ ‘2.0’లో విలన్ గా నటిస్తున్నాడు. ఈ చిత్ర షూటింగ్ ప్రస్తుతం ఢిల్లీలోని ఓ స్టేడియంలో జరుగుతుంది. అక్కడ అక్షయ్ కుమార్ మరియు రజనీకాంత్ ల మధ్య వచ్చే కొన్ని కీలక సన్నివేశాలను చిత్రీకరించారు. ఈ షూటింగ్ స్పాట్ లో అక్షయ్ కుమార్ గెటప్ కు సంబంధించిన కొన్నిఫోటోలు లీకై, సోషల్ మీడియాలో హల్చల్ చేస్తున్నాయి.

ఈ చిత్ర విశేషాలను దర్శకుడు శంకర్ తన అభిమానులతో పంచుకుంటూ... అక్షయ్ కుమార్ చాలా క్రమశిక్షణ వున్న నటుడు. కష్టపడే వ్యక్తి. ఆయనతో కలిసి పనిచేయడం అద్భుతంగా వుంది. ఈ సినిమా ప్రధాన షూటింగ్ పార్ట్ దాదాపు పూర్తయ్యింది. అక్టోబర్ లోపు మిగతా షూటింగ్ పూర్తిచేసి, ఈ ఏడాది చివర్లో సినిమాను విడుదల చేస్తామని శంకర్ చెప్పుకొచ్చారు.