‘కత్తి’ని అడ్డుకున్న దాసరి.. సహాయనిరాకరణ!

Posted: 01/27/2016 05:29 PM IST

Chiranjeevi kaththi remake story in trouble

మెగాస్టార్ చిరంజీవి 150వ సినిమా తమిళ రీమేక్ ‘కత్తి’ చిత్రంతో తెరకెక్కనుందని, ఈ సినిమాకు వి.వి.వినాయక్ దర్శకత్వం వహించనున్నాడని ఇప్పటికే రాంచరణ్ అధికారికంగా ప్రకటించిన విషయం తెలిసిందే. ఇక కథ, దర్శకుడు దొరికాడు.. త్వరలోనే ఈ ప్రాజెక్టు సెట్స్ పైకి వెళ్తుందని అందరూ భావిస్తుంటే... తాజాగా ఈ ప్రాజెక్టుకు ఓ కొత్త సమస్య వచ్చి చేరింది.

‘కత్తి’ సినిమా నిర్మాణంపై కథా హక్కుల వేదిక చైర్మన్ దాసరి నారాయణరావు ఆక్షంలు విధించారు. ‘కత్తి’ సినిమా హక్కులు తనవేనంటూ పోరాడుతున్న రచయిత ఎన్.నరసింహారావుకు న్యాయం జరిగిన తర్వాతనే ఈ సినిమా నిర్మాణం చేపట్టాలని దాసరి నారాయణ రావు తీర్మానించారు. అప్పటివరకు ఈ ప్రాజెక్టుకు దర్శకులు సంఘం, సినీ కార్మికుల ఫెడరేషన్ సహాయ నిరాకరణ చేయాలని నిర్ణయించారు.

కానీ ‘కత్తి’ కథ స్వయంగా తమిళ దర్శకుడు మురుగదాస్ రాసుకొని, తెరకెక్కించినదని తెలుస్తోంది. మరి ఈ ప్రాజెక్ట్ ప్రారంభం అవకముందే ఇలా అడ్డంకులు రావడంతో మెగా అభిమానులు కాస్త కంగారుపడుతున్నారు. త్వరలోనే ఈ అడ్డంకులు తొలగిపోయి, ప్రాజెక్ట్ సెట్స్ పైకి వెళ్లనుందని ఆశిద్దాం.

ఈ సినిమా కోసం ఇప్పటికే చిరంజీవి కోర మీసాలు పెంచారు. ఇందులోని పల్లెటూరి వ్యక్తి పాత్ర కోసం ఇలా కోరమీసాలు పెంచుతున్నాడని అర్థమవుతోంది. మొదటగా ఈ పల్లెటూరి వ్యక్తి పాత్రకు సంబంధించిన చిత్రీకరణ పూర్తి చేసి, ఆ తర్వాత మిగతా పాత్రను షూటింగ్ చేయబోతున్నట్లుగా తెలుస్తోంది.

ఈ ప్రాజెక్టును రామ్ చరణ్, లైకా ప్రొడక్షన్స్తో కలిసి ఈ భారీ చిత్రాన్ని నిర్మించడానికి సన్నాహాలు చేస్తున్నాడు. ప్రస్తుతం ఈ రీమేక్ కు సంబంధించిన ప్రీ ప్రొడక్షన్ కార్యక్రమాలు శరవేగంగా జరుగుతున్నాయి. త్వరలోనే ఈ ప్రాజెక్టు సెట్స్ పైకి వెళ్లనుంది.