నటసింహుడి కొత్త ప్రాజెక్ట్ కి టైటిల్ ఫిక్స్

Posted: 09/19/2015 11:42 AM IST

Balakrishna new movie title sarvabhouma director satyadeva

‘డిక్టేటర్’ సినిమా షూటింగ్ లో ఫుల్ బిజీగా వున్న నటసింహం బాలకృష్ణ.. ఆ తర్వాత 100వ సినిమా బోయపాటి శ్రీను దర్శకత్వంలో చేయనున్నారు. ఆ సినిమా స్ర్కిప్ట్ ఇంకా రెడీ కాకముందే.. మరో కొత్త ప్రాజెక్ట్ కి సంబంధించిన వార్తలు ఇండస్ట్రీలో చక్కర్లు కొడుతున్నాయి. బాలకృష్ణ కొత్త సినిమా టైటిల్ ‘సార్వభౌమ’ అని తెలుస్తోంది. ఈ విషయాన్ని ‘లయన్’ చిత్రాన్ని తెరకెక్కించిన దర్శకుడు సత్యదేవా వెల్లడించారు. తన దర్శకత్వంలో బాలయ్య మరో సినిమా చేయనున్నారని, ఆ చిత్రానికి ‘సార్వభౌమ’ అనే టైటిల్ పెట్టనున్నట్లు ఆయన తెలిపాడు.

సెప్టెంబర్ 19వ తేదీన డైరెక్టర్ సత్యదేవా పుట్టిన రోజు వేడుకలు జరుపుకుంటున్నారు. ఈ సందర్భాన్ని పురస్కరించుకుని ఆయన తన తాజా చిత్రానికి సంబంధించిన విశేషాలను వెల్లడించారు. ఈ సందర్భంగా ఆయన మాట్లాడుతూ.. ‘ఈ పుట్టినరోజు నాకెంతో ప్రత్యేకం. దానికి కారణం బాలయ్యతో నేను చేసిన ‘లయన్’. 'లెజెండ్' వంటి హిట్ సినిమా చేసిన తర్వాత బాలయ్యగారు చేసిన చిత్రం ఇది. నా మీద నమ్మకంతో ఆయన ఈ అవకాశం ఇచ్చారు. ‘లయన్’లో తాను చేసిన గాడ్సే పాత్రను అభిమానులు ఎప్పటికీ గుర్తుంచుకుంటారని బాలయ్య నాతో అనడం ఆనందాన్నిచ్చింది. ఇక, ఈ పుట్టినరోజు నాకు మరో స్పెషల్ కూడా ఉంది. నా దర్శకత్వంలో బాలయ్య మరో సినిమా చేయనున్నారు. ఆయన కోసం ‘సార్వభౌమ’ కథను సిద్ధం చేసి వినిపిస్తే.. త్వరలో చేద్దామని చెప్పారు కూడా. ఆ సినిమా గురించి మరిన్ని విషయాలు బాలయ్యే స్వయంగా చెబుతారు’ అని చెప్పారు.

ఇదిలావుండగా.. ‘లయన్’ చిత్రం హిందీలో రీమేక్ కానుందని సత్యదేవా తెలిపారు. ఆ వివరాలు ఆయన వెల్లడిస్తూ.. ‘ఈ చిత్రం హిందీ రీమేక్ లో నటించడానికి అజయ్ దేవగన్ సుముఖంగా ఉన్నారు. ఈ నేపథ్యంలో ఆయన తండ్రి వీర్ దేవగన్ ‘లయన్’ చూశారు. చాలా ఇంటలెక్చువల్ మూవీ అని మెచ్చుకున్నారు. ప్రస్తుతం ఆ చిత్రానికి సంబంధించిన చర్చలు జరుగుతున్నాయి’ అన్నారు.