బాబు గబ్బర్ సింగ్2... ఏంది ఇంత స్పీడు?

Posted: 06/05/2015 11:26 AM IST

Gabbar singh 2 film completes first schedule

‘గోపాల గోపాల’ తర్వాత పవర్ స్టార్ పవన్ కళ్యాణ్ హీరోగా ‘పవర్’ ఫేం దర్శకుడు బాబీ దర్శకత్వంలో ‘గబ్బర్ సింగ్2’ చిత్రం తెరకెక్కుతున్న విషయం తెలిసిందే. గతకొద్ది కాలంగా ఈ ప్రాజెక్టు ఎప్పుడు సెట్స్ పైకి వెళ్తుందా అని ఎదురుచూసిన అభిమానులకు ఇటీవలే షూటింగ్ ప్రారంభించి ఆనందపరిచారు ‘గబ్బర్ సింగ్2’ చిత్ర యూనిట్.

నటీనటులు, సాంకేతికనిపుణులు, షూటింగ్ లోకేషన్లు, ప్రీ ప్రొడక్షన్ కార్యక్రమాలు... ఇలా అన్ని పనులు పూర్తయ్యాకనే ఈ చిత్ర షూటింగ్ మే 29న ప్రారంభించారు. షూటింగ్ ప్రారంభించిన వారం రోజుల్లోనే మొదటి షెడ్యూల్ పూర్తి చేసేసుకుంది. ఈ వార్త వినడానికి సంతోషంగానే వున్నప్పటికీ అభిమానులు మాత్రం చాలా కంగారుపడుతున్నారు.

త్వరత్వరగా షూటింగ్ పూర్తి చేయాలనే వుద్దేశ్యంతో తమ హీరో సినిమాను దర్శకుడు బాబీ ఫ్లాప్ చేస్తాడేమోనని అభిమానులు కాస్త టెన్షన్ పడుతున్నారు. కానీ దర్శకుడు బాబీ మాత్రం పక్కాగా ఈ చిత్రాన్ని తెరకెక్కిస్తున్నట్లుగా చిత్ర యూనిట్ చెబుతోంది. అన్ని కార్యక్రమాలు పూర్తయ్యాయి కాబట్టి.. షూటింగ్ నిరవధికంగా కొనసాగుతున్నట్లుగా తెలిసింది.

భారీ అంచనాలతో రూపొందుతున్న ఈ చిత్రాన్ని ప్రముఖ నిర్మాత శరత్ మరార్ నిర్మిస్తున్నారు. పవన్ సరసన అనీషా అంబ్రోస్ తొలిసారిగా హీరోయిన్ గా జతకడుతోంది. దేవిశ్రీప్రసాద్ సంగీతం అందిస్తున్నాడు. ఈ చిత్రానికి సంబంధించిన మరిన్ని వివరాలు త్వరలోనే అధికారికంగా ప్రకటించనున్నారు.