జులై నుంచి వెంకీ డబుల్ విక్టరీ ధమాకా

Posted: 06/04/2015 09:42 AM IST

Venkatesh talks about his upcoming films

‘గోపాల గోపాల’ వంటి బ్లాక్ బస్టర్ హిట్ చిత్రం తర్వాత టాలీవుడ్ స్టార్ హీరో విక్టరీ వెంకటేష్ తన కొత్త సినిమాను ఇప్పటి వరకూ ఇంకా ప్రారంభించలేదు. దశరథ్ దర్శకత్వంలో వెంకీ ఓ చిత్రం చేయనున్నాడని వార్తలొచ్చాయి కానీ... అవన్నీ ఉత్త పుకార్లేనని తేలిపోయాయి. దీంతో మళ్లీ వెంకీ కొత్త సినిమాపై అభిమానుల్లో ఉత్కంఠ నెలకొంది. అయితే ఈ విషయంపై వెంకీ తాజాగా ఓ క్లారిటీ ఇచ్చేసాడు.

హైదరాబాద్ లో ఫిల్మ్ ఫేర్ సౌత్ 62వ అవార్డుల వేడుక వివరాలను తెలిపేందుకోసం ఆ సంస్థ తాజాగా ఓ మీడియా సమావేశాన్ని ఏర్పాటు చేసింది. ఈ కార్యక్రమానికి వెంకటేష్ ప్రత్యేక అతిథిగా హాజరయ్యారు. ఈ కార్యక్రమంలో వెంకీ తన తరువాతీ సినిమా విశేషాలను తెలియజేస్తూ... జులై నెలలో తాను నటించబోయే రెండు సినిమాల వివరాలను ప్రకటిస్తానని, ప్రస్తుతం ఆ రెండు ప్రాజెక్టులకు సంబంధించి ప్రీ ప్రొడక్షన్ కార్యక్రమాలు జరుగుతున్నాయని చెప్పుకొచ్చాడు.

జులై నెలలో వెంకటేష్ ఒకటేసారి రెండు సినిమాలను ప్రారంభించబోతున్నాడని అర్థమవుతోంది. మరి ఈ రెండు సినిమాలలో ఏదో ఒకటి ఈ ఏడాది చివర్లో విడుదలవ్వడం ఖాయమని తెలుస్తోంది. మరి ఈ రెండు సినిమాల్లో వెంకీ లుక్స్ పరంగా ఎలా కనిపించనున్నాడో, ఈ సినిమాలు ఎలా వుండబోతున్నాయో అనే విషయం తెలియాలంటే మరికొద్ది కాలం ఎదురుచూడాల్సిందే.