తెలుగు, తమిళంలో కమల్ థ్రిల్లర్ చిత్రం

Posted: 05/18/2015 11:52 AM IST

Kamal haasan next movie title thoongaavanam

లోకనాయకుడిగా పేరు దక్కించుకున్న తమిళ అగ్ర కథానాయకుడు, స్టార్ హీరో కమల్ హాసన్ త్వరలోనే ఓ యాక్షన్, థ్రిల్లర్ మూవీతో మనముందుకు రానున్నాడు. గతకొద్ది కాలంగా విభిన్న చిత్రాలతో కేవలం తమిళంలోనే సినిమాలు చేస్తూ బిజీగా వున్న కమల్ హాసన్... తొలిసారిగా తెలుగు, తమిళ భాషల్లో తెరకెక్కనున్న ఓ చిత్రంలో నటించనున్నాడు.

కమల్ హీరోగా తెలుగు, తమిళ భాషలలో ఏకకాలంలో ఓ చిత్రం రూపొందనుంది. ఈ చిత్రానికి కమల్ దగ్గర అసోసియేట్ గా పనిచేసిన రాజేష్ దర్శకత్వం వహించనున్నాడు. ఈ చిత్ర షూటింగ్ ఈనెల 24న హైదరాబాదులో ప్రారంభం కానుందని కమల్ స్వయంగా తెలియజేసారు.

యాక్షన్, థ్రిల్లర్ గా రూపొందనున్న ఈ చిత్ర షూటింగ్ ను నలభై రోజుల పాటు హైదరాబాద్ లోనూ, మరో నలభై రోజుల పాటు చెన్నైలో జరుపనున్నారు. ఈ చిత్రానికి తమిళంలో ‘తూంగావనం’ అనే టైటిల్ ఖరారు చేసారు. గిబ్రాన్ సంగీతం అందిస్తున్నారు. త్వరలోనే తెలుగు వర్షెన్ కు సంబంధించిన అన్ని వివరాలు అధికారికంగా ప్రకటించనున్నారు.