‘రీమేక్’ల పరంపరం.. తమిళ చిత్రంపై రోహిత్ మోజు!

Posted: 04/25/2015 11:28 AM IST

Nara rohit another tamil remake mann karate

ఇతర భాషాచిత్రాలు మంచి విజయాలు సాధిస్తే చాలు.. కొందరు తెలుగు హీరోలు వాటిని క్యాష్ చేసుకుని తమ ఇమేజ్ పెంచుకోవడం కోసం రీమేక్ లు చేస్తుంటారు. ఎప్పటినుంచో కొనసాగుతూ వస్తున్న ఈ పరంపరను నేటి స్టార్ హీరోలతోపాటు యువహీరోలు సైతం ఫాలో అవుతున్నారు. ఈ జాబితాలో నారా రోహిత్ ఎప్పుడో చేరిపోయాడు. ఇప్పుడు తాజాగా ఈ హీరో మరో తమిళ సినిమాపై మోజు పడి.. దానిని తెలుగులో రీమేక్ చేసే పనిలో పడ్డాడు.

మొదటినుంచి విభిన్నమైన కథాంశాలను ఎంచుకుంటూ తనదైన శైలిలో దూసుకుపోతున్న నారా రోహిత్.. ఆమధ్య తమిళంలో ఘనవిజయం సాధించిన ‘మాన్ కరాటే’ చిత్రాన్ని వీక్షించాడు. ఈ సినిమా తన శైలికి తగినట్లుగా వుందని, సరికొత్త కథాంశంతోపాటు వెరైటీ ఎలిమెంట్లు ఇందులో వున్న నేపథ్యంలో ఈ మూవీని తెలుగులో రీమేక్ చేయడానికి రోహిత్ డిసైడ్ అయ్యాడు. ఈ మేరకు తన కోరికను వెల్లడించిన నేపథ్యంలో.. అప్పుడు ప్రీ ప్రొడక్షన్ కార్యక్రమాలను మొదలుపెట్టినట్లు సమాచారం!

ఈ రీమేక్ సినిమాను ఇటీవలే ‘జోరు’ చిత్రాన్ని రూపొందించిన కుమార్ నాగేంద్ర దర్శకత్వం వహించనున్నాడు. ‘జిల్’ సినిమాలో స్టైలిష్ విలన్ గా ప్రేక్షకులకు కనువిందు చేసిన మోడల్ కబీర్ దుహన్ సింగ్.. ఈ సినిమాలోనూ విలన్ గా నటించనున్నాడు. ఈ మూవీకి సంబంధించిన అధికారిక వివరాలు త్వరలోనే వెల్లడి కానున్నాయి. మరోవైపు.. నారా రోహిత్ నటించిన ‘శంకర’ (మౌనగురు రీమేక్) సినిమా విడుదలకు సిద్ధంగా వుంది. అలాగే ఇతని మరో రెండు సినిమాలు ‘పండగలా వచ్చాడు’, ‘అసుర’ నిర్మాణ దశలో వున్నాయి.